Суу байлыкъланы Битеудуния кюнюне атап, РусГидро Нальчикде 10 номерли мектепде ачыкъ дерс бардырылгъанды. Анга гитче классланы окъуучулары къатышхан эдиле.

Школчула компанияны иши бла шагъырейленнгендиле, Къабарты-Малкъарда гидроэлектростанцияланы юслеринден кёп сейир хапар эшитгендиле. Дагъыда сууланы бла кёллени таза энергияны чыгъарыуда магъаналылыгъын ангылагъандыла. Ахырында уа Республикалы сабий экология-биология араны келечилери алагъа суу бла байламлы сейирлик затла кёргюзтгендиле. Сабийле аны къаллай тюрлюлери болуучусун, кесин да къалай таза этиучюлерин билгендиле.

Гитче къонакъла окъугъан школгъа, ол арагъа да гидроэнергетикле «Лап Лапычны тамашалы жолоучулугъу» китапны саугъагъа бергендиле. Ол а эм гитчелеге деп жарашдырылгъан китапды, кеси да сатыуда болмайды, жаланда компания ишлеген регионлада конкурслада хорлагъанлагъа бла экология акциялагъа къатышханлагъа саугъагъа юлешинеди эмда библиотекалагъа бериледи.

Эсге сала айтсакъ, суу байлыкъланы Битеудуния кюню жыл сайын 22 мартда белгиленеди. Бу байрамны ООН-ну Генеральный ассамблеясыны оноуу бла къурагъандыла. Аны магъанасы – быллай байлыкъланы къоруулаугъа эмда сакълаугъа адамла иги эс бурурча этиудю.

Улбашланы Мурат.