Кёп болмай КъМР-ни табийгъат байлыкъла эмда экология министри Шауаланы Илиясны башчылыгъы бла Нальчикни агъач мюлкюню Кенжеде бёлюмюнде юйрениулени экинчи кесеги ётгенди. Анга оноу этген органланы, къыйын болумланы (ёртенлени) кезиуюнде билдириу, къутхарыу, эл жерлени, экономика объектлени, социал инфраструктураланы къоруулау жаны бла бир къырал системаны кючлери да къатышхандыла.
Быллай ишни магъанасы – агъачлагъа от тюшмезине сакъ болургъады эм заманында мадар эте билиргеди. Аны ючюн от тюшмезине агъачда ишлерча, диспетчер служба бла да байламлыкъ жюрютюрча сынамларын кючлерге керекдиле. Бу жол юйрениулеге жюз адам эм жыйырма тёрт энчи техника къатышхандыла.
- Жаш башы от тюшерге къоркъуулу заманнга саналады. Быйыл кюн эрттерек жылыннганы себепли, иги да алгъадан хазырланыргъа тюшгенди. Сынамлы коллегаларым не тюрлю болумгъа да хазырлыкъларын кёргюзтгендиле. Юйрениулени кезиуюнде ала биригип салыннган борчну тынгылы толтуралгъандыла. Аны бла бирге техникалары бла оборудованияларын да сынагъандыла,- дегенди Шауа улу.
Эсге сала айтсакъ, «Экология» миллет проектге кирген «Агъачланы сакълау» федерал проектни магъанасы регионлада агъач фондланы сакъларгъа эм иги болум къураргъады.
