Темыркъан Юрэ и цIэр зезыхьэ Къэрал концерт гъэлъэгъуапIэм, концерт щитащ щапхъэу къалъыта, УФ-м и Лъэпкъ гвардием и зауэлIхэм я оркестрым (полковник Шахмухаметов Азат и унафэм щIэтым).
Пшыхьым зрагъэхьэлIащ Урысей гвардием къулыкъу щызыщIэхэмрэ абыхэм я унагъуэхэм щыщхэмрэ, ветеран IуэхущIапIэхэм, къалэ администрацэм я лIыкIуэхэм, республикэм щыпсэухэмрэ ди хьэщIэхэмрэ.
Концертыр ирагъэжьащ «Офицеры» кинофильмым щыщ «Вечный огонь» уэрэдымкIэ. Ар игъэзэщIащ оркестрым и уэрэджыIакIуэ, урысейпсо, лъэпкъыбэ зэпеуэхэм я лауреат Чеботарёв Дмитрий. Хэкум теухуа цIыхубэ уэрэдхэм къыдэкIуэу, адэкIэ жаIащ Окуджавэ Булат, Шведов Яков, Рождественский Роберт, Фатьянов Алексей, Евтушенкэ Евгений, Козловский Геннадий, Магомаев Муслим, нэгъуэщIхэми ягъэзащIэу щытахэм щыщ.
- Концертыр тедухуащ Хэку зауэшхуэм совет цIыхубэм ТекIуэныгъэ Иныр къызэрыщахьрэ илъэс 80 зэрырикъумрэ мы гъэр Хэкур хъумэным и илъэсу зэрагъэувамрэ. Пшыхьым къекIуэлIа дэтхэнэ зыми дгъэзэщIа уэрэдхэр игу къинэжыну дыщогугъ, - жиIащ симфоние оркестрым и унафэщIым и къуэдзэ, подполковник Шибаев Дмитрий.
Зэхыхьэр зэхуащIыжащ Хардиков Ильярэ оркестрым хэтхэмрэ зэдагъэзащIэ «Желаю тебе, земля моя» уэрэд цIэрыIуэмкIэ. КърихьэлIахэм концертыр ягу зэрыдыхьам и щыхьэту, артистхэм Iэгуауэ ин хуаIэтащ, фIыщIэ хуащIащ. Оркестрым и артистхэмрэ музыкантхэмрэ фIыщIэ тхылъхэр иратащ Урысей гвардием и республикэ къудамэм и управленэм и унафэщI, полицэм и генерал-майор Васильев Сергей къыбгъэдэкIыу.
ТЕКIУЖЬ Заретэ.
