Къэбэрдей-Балъкъэр Республикэм Наркотикхэм япэщIэтынымкIэ и комиссэм и зэIущIэ иригъэкIуэкIащ республикэм и Iэтащхьэ КIуэ­кIуэ Казбек.

ЗэIущIэм щыхэплъащ Урысей Федерацэм наркотикхэм япэщIэтыным теухуауэ щрагъэ­кIуэкI политикэм и унэтIыныгъэ нэхъыщхьэхэм щыубзыхуахэр Къэбэрдей-Балъкъэр Республикэм 2024 гъэм зэрыщагъэзэщIам, афиянхэкI зэзыхьэлIэхэр гъэхъужыным, абыхэм социальнэ дэIэпыкъуныгъэ ягъуэтыным пыщIа Iуэхухэм прокурорхэм я нэIэ зэрытетым. Апхуэдэу абы щызэпкърахащ Налшык, Бахъсэн къалэ округ­хэм наркотикхэм япэщIэтынымкIэ я комиссэхэм я лэжьыгъэр зыхуэдэр.
 Къыхэбгъэщ хъунущ, наркотикхэр хабзэншагъэкIэ игъэкIыным пыщIа щIэпхъаджагъэхэр къыщIэгъэщынымкIэ хабзэхъумэ IэнатIэхэм я лэжьыгъэр нэхъ зэрефIэкIуар. Абы къыдэкIуэу, уегъэгузавэ синтетикэ наркотик гуащIэхэр нэхъыбэ зэрыхъуам, интернетым и Iэмалхэр къагъэсэбэпу ялэжь апхуэдэ щIэпхъаджагъэхэми къазэрыхэхъуэм.
Республикэм щызэтраухуащ наркоманхэм дохутыр-социальнэ дэIэпыкъуныгъэхэр ягъуэты­ным, афияным игъэсымэджахэр жылагъуэ гъащIэм тэмэму къыхэшэжа хъуным яхуэгъэза лэжьыгъэр, стационар, амбулаторнэ программэхэм пхыкIа апхуэдэ сымаджэхэм я бжыгъэми хэхъуащ.
ЗэIущIэм зыщытепсэлъыхьахэм, апхуэдэу наркотикхэм япэщIэтынымкIэ щIыналъэ комиссэм и лэжьэкIэм теухуауэ къыхалъхьа чэнджэщхэм япкъ иткIэ унафэ пыухыкIахэр къащтащ, наркотикхэр ирагъэкIыным пэщIэтыным, щIалэгъуалэр а узыфэм щыхъумэным хуэгъэ­зауэ.