Къэбэрдей-Балъкъэрым ЩэнхабзэмкIэ и фондым, Вэрокъуэ Владимир и цIэр зезыхьэм, щекIуэкIащ ГъуазджэхэмкIэ Кавказ Ищхъэрэ къэрал институтым и егъэджакIуэ, КъБР-м щIыхь зиIэ и артист, музыкант, усакIуэ, уэрэджыIакIуэ гъуазджэмкIэ кафедрэм и доцент КъуийцIыкIу Валерэ и концерт. Ар къызэрагъэпэщащ и ныбжьыр илъэс 75-рэ зэрырикъумрэ егъэджакIуэ лэжьыгъэм илъэс 30 хъуауэ зэрыпэрытымрэ я щIыхькIэ.

Пшыхьым зыкърагъэхьэлIат бзылъхугъэхэм я «Надежда России», «Юбилейная» зэгухьэныгъэхэм щыщхэм, колледж зыбжанэм я студентхэм.

Пшыхьым къекIуэлIахэр дежьууащ КъуийцIыкIу Валерэ игъэзащIэ совет уэрэдхэм икIи едэIуащ Кавказ Ищхъэрэм и хэгъэгухэм, Узбекистаным щыщ и гъэсэнхэр къызэджа усэхэмрэ жаIа уэрэдхэмрэ.

- Зи лэжьэкIэм, уэрэд жыIэкIэм фIыуэ дыщыгъуазэ КъуийцIыкIу Валерэ и пшыхьым ди гуапэу дыхэтащ. ДызэрыцIыкIурэ тщIэ уэрэдхэмрэ и усэщIэхэмрэ тфIэфIу дедэIуащ, - жиIащ КПРФ-м и «Юбилейная» зэгухьэныгъэм хэт Къудей Лидэ. – Уэрэд жыIэнымкIэ ар егъэджакIуэ Iэзэу зэрыщытым иджыри зэ щыхьэт техъуащ и гъэсэнхэм я уэрэд гъэзэщIэкIэр. Студентхэм удихьэхыу, Iэзагъышхуэ зэрахэлъыр нэрылъагъуу зыкъагъэлъэгъуащ.

Пшыхьым щагъэзэщIащ Магомаев Муслъим, Бейбутов Рашид, Герман Аннэ сымэ жаIэу щыта уэрэд цIэрыIуэхэр, адыгэ, балъкъэр тхакIуэхэм я Iэдакъэ къыщIэкIахэр. НэхъыжьыIуэхэм ноби ягу къинэжащ КъуийцIыкIу Валерэ Музыкэ театрым щыщылэжьам оперэ зыхэтахэм щигъэзэщIа ариехэр.

Мыри къыхэгъэщыпхъэщ. КъуийцIыкIу Валерэ иригъэджахэм къахэкIащ Къэбэрдей-Балъкъэр, Къэрэшей-Шэрджэс, Дагъыстэн, Адыгэ республикэхэм щIыхь зиIэ я артист зыбжанэ. Абы шэч къытрихьэркъым макъамэкIэ, усэрэ уэрэдкIэ дунейр зэрыпхуегъэфIэкIуэнум.

ЩэнхабзэмкIэ фондым и унафэщI Мэкъуауэ Люазэ КъуийцIыкIу Валерэ и гуапэу ехъуэхъуащ, фIыщIэ тхылърэ Вэрокъуэ Владимир и тхылъхэм щыщрэ тыгъэ хуищIащ.

ТЕКIУЖЬ Заретэ.