Лескен районда  «Кавказ» Р-217 федерал жолда Урух сууну  кёпюрюне тынгылы ремонт этилликди эм тёрт ызгъа дери кенгертилликди.

Узунлугъу 163 метрге жетген эки ызлы кёпюр бюгюнлюкде транспорт ауурлукъгъа артыкъ келишмейди. Аны юсю бла суткагъа 35 машина жюрюйдю.  Андан сора да, тозурагъаны бла байламлы жангыртылыргъа тийишлиди.  Ишлени кезиуюнде транспорт тыйгъычсыз жюрюрча эм къыйын участокда къоркъуусузлукъ жалчытылынырча да боллукъду. Къурулуш ишле баргъан кезиуде роставтодорну  автомашина жоллагъа къарагъан «Кавказ» управлениясыны заказы бла болжаллы халда  темир кёпюр  жарашдырыллыкъды.

Ишлени кезуюнде кёпюрню кетерип, чигинжилерин кючлерикдиле эм жангы мардалагъа келишген   аркъаула саллыкъдыла.  Ызы бла бетон къуюп, суу сингмезча да мадар этилликди эм эки къат асфальт жайыллыкъды.  Алай бла аны кенглиги 25 метрге жетдирилликди. Ызланы кенгилиги уа 3,5 метр боллукъду.

Къоркъуусузлукъгъа да аслам эс буруллукъду. Аны чеклеринде темир буруула, чыпынлы чыракъла, белгиле  эм ызла да салынырыкъдыла.  Жаяу жюрюгенлеге да тротуар ишленирикди.  ёпюрде   жангы технологияла да хайырланныкъдыла. Сёз ючюн, сууукълда бузламазча автомат халда бузну эритген  реагент чачдырыллыкъды.

Эсге сала айтсакъ, «Кавказ» Р-217 федерал жол «Север ‒ Юг» деген халкъла аралы  коридоргъа киреди. Ол  Къабарты-Малкъарны, Шимал Осетия эм  Ставрополь  крайны бирге  байлайды.  Жолну районлада жашагъанла да тири хайырлнадыла.

Планнга кёре, объект 2027 жылдан кеч къалмай хайырланыргъа берилирге керекди.

Бизни корр.