МСП Корпорацияны болушлугъу (гарантияла берип) бла  саулай Россейде  гитче эмда орта бизнес бла кюрешгенле былтыр 1,18 триллион сом къоллу болгъандыла. Буруннгу жыл бла тенглешдиргенде,  ол сегиз процент къошханды, дегендиле КъМР-ни Экономиканы айнытыу министерствосунда.

Ары дери аллай уллу кёрюмдю, не ахча, не аны алгъанланы саны бла бир керек да болмагъанды. Ол кезиуде болушлукъ 74 минг предпринимательге берилгенди. Сёз ючюн, 2023 жылда аланы саны 71 процентге аз эди.

Корпорацияны башчысы Александр Исаевич айтханнга кёре: «2024 жылда гитче эмда орта бизнес айнып, ёсюп баргъанды, ала бла кюрешгенлени саны 6,59 миллионнга жетгенди. Ол а  ол санда  къырал болушлукъ этип тургъаныны хайырындан болгъанды. Аны берген гарантияланы хайырындан быллай субъектле былтыр банкладан 1,18 триллион сом кредитле алгъандыла. Дагъыда  илму-техника жумушла бла кюрешген организациялагъа болушлукъ бериу да ёсе барады; былтыр ол,  эки кереге кёбейип, 81,5 миллиард сомдан атлагъанды. Информациялы технологиялада уа ёсюм онеки процентге жетгенди».

Бу амал бла болушлукъну башхаладан эсе асламыракъ жарашдырыучу производствола, къурулуш эмда илму-техника организацияла, жюкле ташыу эмда сакълау, эл мюлк, информациялы технологияла, жамауатха аш этиу бла кюрешген эмда къонакъ юйлени жумушларын жалчытхан предприятияла алгъандыла.

Къабарты-Малкъарда уа гитче эмда орта бизнес бла кюрешгенле  былтыр къырал берген гарантияланы хайырындан банкладан 4,5 миллиард сом алгъандыла. Буруннгу жыл бла тенглешдиргенде, бу кёрюмдю эки кереге ёсгенди. Программаны хайырын 243 предприниматель кёргенди (2023 жылдан 1,8 кереге кёп).

Министерствода айтханларыча, МСП Корпорация бла бирге быллай онгланы талай къырал эмда муниципал микрофинанс организация береди.

Улбашланы Мурат.