2024 - 2025 гъэ еджэгъуэм Къэбэрдей-Балъкъэрым и курыт еджапIэхэм я пэщIэдзэ классхэм щIэс еджакIуэ 48576-р ерыскъы пщтырхэмкIэ пщIэншэу къызэрагъэпэщ. Абы нэмыщI, сабий 39-м щхьэхуэу яхуопщафIэ, я узыншагъэхэр ерыскъым зэрыхуэкIуэм тещIыхьауэ, къитащ КъБР-м Егъэджэныгъэмрэ щIэныгъэмкIэ и министерствэм.

Апхуэдэуи льготэ зиIэхэм хыхьэу 1 - 11-нэ классхэм хэс сабий 12385-р шхын пщтырхэмкIэ къызэрагъэпэщ. Абыхэм яхэтщ зи узыншагъэр зэкIэлъымыкIуэ сабийхэр, ныкъуэдыкъуэхэр, унагъуэ быныфIэхэм, хуэмыщIауэ псэухэм щыщхэр, дзэ Iуэху хэхам щыIэхэмрэ ветеранхэмрэ я бынхэр.

Къэралым и курыт еджапIэхэм я шхапIэхэр егъэфIэкIуэным, абыхэм щагъэхьэзыр шхыныгъуэхэм къэуату ящIэлъымрэ IэфIагъымрэ хэгъэхъуэным хуэунэтIауэ нэгъабэ ди деж щекIуэкIащ «Школым и шхапIэ нэхъыфI-2024» урысейпсо зэхьэзэхуэм и щIыналъэ Iыхьэр. Абы щытекIуауэ щытащ Бахъсэн щIыналъэм хыхьэ ХьэтIохъущыкъуей къуажэм и прогимназием и шхапIэм и лэжьакIуэхэр. ИужькIэ ахэр хэтащ Мордовием и къалащхьэ Саранск щекIуэкIа кIэух зэпеуэм икIи абы и лауреат хъуахэщ, «Сабиигъуэм и IэфIыпIэ» зэхьэзэхуэм и саугъэтри къахьащ.

ТОМЭКЪУЭ Iэдэм.