Сабий творчествэмкIэ «Эрудит» центрым щрагъэжьащ сурэтыщI, декоративно-прикладной гъуазджэхэмкIэ «Палитра ремёсел – 2025» урысейпсо зэпеуэм и щIыналъэ Iыхьэр. Ар теухуащ Хэку зауэшхуэм ТекIуэныгъэ Иныр къызэрыщытхьрэ илъэс 80, Налшык «ЗауэлI щIыхьым и къалэ» щIыхьыцIэр къызэрыхуагъэфащэрэ илъэс 15 зэрырикъум.

Иджырей зэхьэзэхуэм хэтащ республикэм и курыт еджапIэхэм я еджакIуэ 80-м нэблагъэ. Ар къызэрагъэпэщащ сабий, ныбжьыщIэ творчествэмкIэ «Хоровод традиций – 2025» урысейпсо фестивалым хыхьэу, зэфIэкI зиIэ сабийхэм лъэпкъ щэнхабзэм, цIыхубэ IэщIагъэм, сурэт щIыным, техникэ творчествэм, художественнэ щIэныгъэм, эстетикэм щаIэ ехъулIэныгъэхэм нэхъри зрагъэужьын, щIэблэр Хэку лъагъуныгъэм, лъэпкъ тхыдэм щIапIыкIын папщIэ.

Зэпеуэм хэтщ Налшык къалэм и курыт еджапIэхэм илъэси 10-м щыщIэдзауэ илъэс 18 ныбжьым ит я еджакIуэхэр. НыбжьыщIэхэм я лэжьыгъэхэр траухуащ Хэку зауэшхуэм ТекIуэныгъэ Иныр къызэрыщахьрэ илъэс 80 зэрырикъум. Сабий творчествэмкIэ центрым щагъэлъэгъуащ сабийхэм жанр, техникэ я лъэныкъуэкIэ зэщхьэщыкIыу я Iэдакъэ къыщIэкIахэр.

- Музыкэ театрым и балетмейстер нэхъыщхьэ, КъБР-м гъуазджэхэмкIэ щIыхь зиIэ и лэжьакIуэ ПащIэ Рамед и «Аллегро» балет студием сокIуалIэ. Аращ зэпеуэм щхьэкIэ балеринэ гуащэ щIэсщIари. Балеринэм и теплъэр ятIэ гъэжьам къыхэсщIыкIащ, и щыгъынхэри хуэздащ. Зэпеуэ зэмылIэужьыгъуэхэм щыдгъэлъагъуэ, фIыуэ слъагъу къафэхэрщ (Шостакович Д. и «Вальс-шутка», Гаврилин В. и «Тарантелла») мы лэжьыгъэр сигу къэзыгъэкIар, - жеIэ «Палитра ремёсел» Iуэхум хэт, «Эрудит» центрым и гъэсэн Мустафинэ Ланэ. – Ди егъэджакIуэ Даниленкэ Оксанэ дытрегъэгушхуэ зэхьэзэхуэхэм ди зэфIэкI дыщеплъыжыну икIи сыткIи къыддоIэпыкъу. Мы зэпеуэм къинэмыщIауэ, сыхэтщ ди курыт еджапIэм Хэку зауэшхуэм теухуауэ къыщызэрагъэпэща зэхьэзэхуэми.

Хьэсэней къуажэм и курыт еджапIэ №I6-м щыщ ныбжьыщIэхэм зэпеуэм хуагъэхьэзыращ Хэку зауэшхуэ зэманым щыIа кхъухьлъатэхэм ещхьхэр, дзэм теухуа 3-D сурэтхэр, мывэхэмрэ хьэпIацIэ щыгъэхэмрэ къыхэщIыкIа, бзылъхугъэхэм зэрызагъэдахэ цIуугъэнэхэр, сумкэхэр, фэилъхьэгъуэхэр, удз гъэгъа IэрыщIхэр, нэгъуэщIхэри. НыбжьыщIэхэм я егъэджакIуэр Мамаевэ Iэсиятщ.

Курыт еджапIэ №11-м и гъэсэнхэм ягъэхьэзыращ нарт IуэрыIуатэм щыщ «Дахэнагъуэ» теплъэгъуэм къытращIыкIа лэжьыгъэ. Ар Гуащэ театрым щагъэлъэгъуэнущ. хыхьэу ЛIыхъужьхэм я теплъэхэр щхьэхуэу ящIащ. Спектаклым ирагъэплъынущ школым и пэщIэдзэ классхэм щеджэхэр. Я егъэджакIуэр Гадельшинэ Галинэщ.

НэхъыфIхэр къыхэхыным теухуауэ къэпщытакIуэхэм къапэщылъ къалэныр тынштэкъым. Нэхъыщхьэращи, абыхэм ягу дыхьащ еджакIуэхэм ягъэлъэгъуа лэжьыгъэ хьэлэмэтхэр.

ТЕКIУЖЬ Заретэ.