Дунейпсо Адыгэ Хасэм къыхилъхьауэ, Адыгэ тхыбзэм и махуэм Къэ­бэрдей-Балъкъэрым зэгъусэу Iуэрытх щатх нэхъыжьи нэхъыщIи, цIыху къызэрыгуэкIи къулыкъущIи. ЦIыху­хэр щызэхуос къалэ, къуажэ курыт еджыпIэхэм, библиотекэхэм. 

Мы гъэм ар ебланэу къызэрагъэпэщащ. Iуэрытхыр Налшык къалэм щрагъэтхащ Къэбэрдей-Балъкъэр къэрал мэкъумэш университетым, КъБКъУ-м, КъБР-м и Лъэпкъ библиотекэм.
Адыгэбзэм и пщIэр къэIэтыжыным, лъэпкъым и анэдэлъхубзэр егъэфIэ­кIуэ­ным, щэнхабзэр хъумэным хуэгъэпса мы Iуэхур онлайн, офлайн щIыкIэхэм ­тету ирагъэкIуэкIащ. Мы гъэм Iуэрытхым папщIэ къыхахар Къэрмокъуэ Хьэмид и тхыгъэщ - «ДжэгуакIуэхэмрэ ­Хэкум и хъумакIуэхэмрэ» фIэщыгъэр иIэу. 
- Адыгэ тхыбзэм и махуэмкIэ нобэ ­псоми сынывэхъуэхъуну сыхуейщ. Ди лъэпкъыр сыт щыгъуи щIэращIэу, и хабзэкIи, и бзэкIи, и дуней тетыкIэкIи зиузэщIу зэманым дэгъуэгурыкIуэну си ­гуапэщ. Мыпхуэдэ Iуэху дахэ хэтыну гупыж зыщIахэм фIыщIэ фхудощI. 2025 гъэр Хэкум и хъумакIуэм и илъэсу къэ­ралым зэрыщагъэувар къэтлъытэри, Къэрмокъуэ Хьэмид и тхыгъэр къыхэтхащ. Iуэрытхым кърихьэлIахэм тхыгъэм къыфхуеджэну хуэдгъэфэщащ 2024 гъэм «Лъэп­къыбзэмрэ литературэмкIэ егъэджакIуэ нэхъыфI» республикэ зэ­пеуэм текIуэныгъэр къыщызыхьа Жы­лау Жаннэ. Ар ди республикэм къыбгъэдэкIыу хэтащ урысейпсо зэпеуэми», - жиIащ ­Дунейпсо Адыгэ Хасэм и тхьэмадэм и ­къуэдзэ Щоджэн Iэминат.
Лъэпкъ библиотекэм Iуэрытхыр зы­тхыну къыщызэхуэсахэм захуигъэзащ Къэбэрдей Адыгэ Хасэм и тхьэмадэ ХьэфIыцIэ Мухьэмэд. Ар псоми ехъуэ­хъуащ Адыгэ тхыбзэм и махуэр лъэп­къым хуэфIыну. «Нобэ ди республикэм и мызакъуэу, адыгэ Iуэрытхыр щатх Къэ­рэшей-Шэрджэсми, Адыгейми, уеблэмэ адыгэхэр щыпсэу хамэ къэралхэми. Мы Iуэху дахэр иджыри илъэс куэдкIэ тхуе­гъэкIуэкIыну Тхьэм жиIэ», - къыхигъэщащ абы. ХьэфIыцIэм къызэхуэсахэр щигъэгъуэзащ Iуэрытхым къыхухаха тхы­гъэр зи IэдакъэщIэкI Къэрмокъуэ Хьэ­мид къыщалъхуа махуэри гъатхэпэм и 14-м зэрытехуэм. Абы ЩIэныгъэхэмкIэ Дунейпсо Адыгэ Академием къыбгъэдэкIыу Лъэпкъ библиотекэм тыгъэ ­хуищIащ иужьрейуэ къыдагъэкIа тхы­лъипщIрэ журнал зыбжанэрэ. 
Адыгэбзэ Хасэм и тхьэмадэ Табыщ Мурат жиIащ: «Мы гъэр Хэкум и хъу­ма­кIуэм и илъэсу ягъэуващи, къэралым абы епхауэ Iуэхугъуэ куэд щокIуэкI. Дэри абы тегъэщIауэ тхыгъэр къыхэтхащи, дыщогугъ ар гунэс фщыхъуну. Къэр­мокъуэ Хьэмид и тхыгъэр Хэкур фIыуэ лъагъун зэрыхуейм и мызакъуэу, адыгэ гъащIэм, лъэпкъ щэнхабзэм, гупсысэ­кIэм зэрепхам и мыхьэнэр нэхъ иныж зэрищIыр шэч зыхэмылъщ. Анэдэлъхубзэм пщIэ хуэтщIу, лъэпкъым зедгъэу­жьыфу, Хэкум дыкъыщхьэщыжыфу ди гъуэгуанэр адэкIи дыухуэфыну ди гу­гъапIэщ. Тхыгъэр тынш дыдэу пхужыIэнукъым, ауэ абыи зы фIагъ гуэр хэлъщ - узыщымыгъуазэ гуэр къэпщIэху, уи щхьэм ибубыдэху, къэухьми зеужь. Тхьэм фригъэфIакIуэ».

Сурэтыр  Къарей Элинэ  трихащ.

БАГЪЭТЫР Луизэ.