КъБР-м и Парламентым и депутатхэр, «Къэрал сыхьэтым» хыхьэу, яIущIащ Налшык къалэм предмет щхьэхуэхэр нэхъ куууэ щрагъэдж, Пушкин Александр и цIэр зезыхьэ курыт школ №5-м и 11-нэ классхэм щIэсхэм.
ЩIалэгъуалэм епсэлъащ республикэм и хабзэубзыху IуэхущIапIэм ЕгъэджэныгъэмкIэ, щIэныгъэмкIэ, физическэ щэнхабзэмкIэ, спортымрэ щIалэгъуалэм я IуэхухэмкIэ и комитетым и унафэщI Емуз Нинэ, Жылагъуэ шынагъуэншагъэмрэ Iулъхьэм пэщIэтынымкIэ комитетым и унафэщI Кривко Михаил, Лъэпкъ зэхущытыкIэхэмкIэ комитетым и унафэщIхэм ящыщ, ПромышленностымкIэ, транспортымкIэ, связымрэ гъуэгу IэнатIэмкIэ комитетым и унафэщIым и къуэдзэ Байдаев Сэлихь сымэ.
Депутатхэм къыхагъэщащ апхуэдэ зэIущIэхэр хабзэ дахэ хъуауэ зэрырагъэкIуэкIыр, щIыналъэм и хабзэубзыху лэжьыгъэм щIалэгъуа-лэр хэгъэгъуэзэнымкIэ ар зэрыIэмалыфIыр. ШколакIуэхэр ирагъэплъащ КъБР-м и Парламентым теухуа фильм кIэщIым.
Емуз Нинэ жиIащ ныбжьыщIэхэм я Iуэху еплъыкIэхэр зрагъэщIэну зэрафIэгъэщIэгъуэныр, я упщIэхэм жэуап иратыну зэрыхьэзырыр. Абы къыхигъэщащ хабзэхэр къыщащтэ пэшым ахэр къызэрырагъэблэгъам Парламентым и лэжьыгъэр нэхъ нэрылъагъу щIалэгъуалэм зэращищIынур. Депутатыр тепсэлъыхьащ я лэжьыгъэр зэраубзыхум.
Кривко Михаил тепсэлъыхьащ зи унафэщI комитетым зэфIигъэкIым, жэрдэмхэр зэрагъэбелджылым, хабзэхэр къызэращтэм.
Байдаев Сэлихь и гугъу ищIащ республикэм и промышленностым, связым, гъуэгухэмрэ транспортымрэ зэрызыщрагъэужь щIыкIэм.
Депутатхэр къытеувыIащ хабзэубзыху IуэхущIапIэм и комитетхэм я къалэнхэр зэрагуэшым, абы епхауэ лажьэ ЩIалэгъуалэ палатэмрэ Жылагъуэ советымрэ ирагъэкIуэкI лэжьыгъэхэм, цIыхухэм зэраIущIэм, нэгъуэщIхэми.
КъищынэмыщIауэ, депутатхэм жэуап иратащ ныбжьыщIэхэм я упщIэхэм. Ахэр теухуат щIалэгъуалэ политикэм, ЕГЭ-м и фIагъхэмрэ щыщIэныгъэхэмрэ, Къэбэрдей-Балъкъэрым спортымрэ узыншагъэр хъумэнымкIэ и IэнатIэхэм зэрызрагъэужьым.
ЩIалэгъуалэм депутатхэм фIыщIэ хуащIащ хабзэубзыху IуэхущIапIэм зэрырагъэблэгъам, зэIущIэр гуапэу, гъэщIэгъуэну зэрекIуэкIам папщIэ.
Нэхъыжьхэм я чэнджэщи зэхахащ щIалэгъуалэм: IэщIагъэ къызэрыхахынум, я къэухьым хагъэхъуэн зэрыхуейм ехьэлIауэ. ЩIалэгъуалэм КъБР-м и Парламентым зыщрагъэплъыхьащ, зэгъусэу сурэт зытрагъэхащ.
