Дзэлыкъуэ щIыналъэм хыхьэ Сэрмакъ къуажэм дэт Махуэ Дадушэ и цIэр зезыхьэ ЩэнхабзэмкIэ унэр къызыхуэтыншэу зэрагъэпэщыжащ. 1983 гъэм яухуауэ щыта унэр къагъэщIэрэщIэжащ «Щэнхабзэ» лъэпкъ пэхуэщIэм ипкъ иткIэ икIи илъэс кIуам и кIэхэм абы и бжэр къызэIуихыжащ.
Къуажэдэс сабийуэ 100-м щIигъу нобэ къокIуалIэ творчествэм, акъылым зегъэужьыным хуэунэтIауэ мыбы щыIэ секцэхэм. ЖыпIэнурамэ, дерсхэр щрагъэкIуэкI дыщэпскIэ хэдыкIынымкIэ, сурэт щIынымкIэ, уэрэд жыIэнымкIэ, театр гъуазджэмкIэ. Апхуэдэуи шахматым, шашкэм дихьэх балигъхэри нэхъыщIэхэри щIэх-щIэхыурэ мы унэм щызэхуос. Гугъэ щыIэщ сурэт, видео техыным, ахэр тэмэу зэгъэкIужыным, зэхэгъэувэным щыхуагъэсэну секцэ мыгувэу къызэIуахыну.
ЩэнхабзэмкIэ унэм хэтщ къуажэ библиотеки. Абы нэмыщI, мыр и хэщIапIэщ зэхьэзэхуэ, гъэлъэгъуэныгъэ куэдым хэта, абыхэм мызэ-мытIэу щытекIуа «Си Сэрмакъ» къэфакIуэ гупри. «Пушкиным и картэ» программэр ягъэзэщIэкIэрэ «Карлик Нос» спекталыр мыбы щигъэлъэгъуащ Къэбэрдей-Балъкъэр гуащэ театрым.
Сэрмакъ къуажэм ЩэнхабзэмкIэ и унэм и унафэщI Къалэ Альберт зэрыжиIамкIэ, къызыхуэтыншэу зэрагъэпэщыжа IуэхущIапIэм «псэщIэ къыхыхьэжащ» икIи сабийхэм я творчествэ зэчийм зегъэужьын папщIэ, узыхуеину хъуар щыIэщ, къэнэжыр зыщ - жылэдэсхэр къешэлIэнырщ, абыхэм дегъэхьэхынырщ. «Дэ мурадышхуэхэр диIэщ, къуажэдэсхэм жыджэру ахэр къыддаIыгъ, дыхущIэкъунущ гурэ псэ-кIэ ди лэжьыгъэм дызэрыбгъэдэтыным, къалэнхэр тэмэму зэретхьэкIыным», - къыхигъэщащ унафэщIым.
Дзэлыкъуэ щIыналъэм щэнхабзэмкIэ и IэнатIэм жыджэру зрагъэужьын щыщIадзар 1970 - 80 гъэхэрщ. А лъэхъэнэхэм къриубыдэу ЩэнхабзэмкIэ унэхэр къыщызэIуахащ Дзэлыкъуэ, ЯтIэкъуэ, Псынэдахэ, Чыщбалъкъ, Хьэбэз къуажэхэм, Сэрмакъ жылэм - кинотеатр. Къуажэм щэнхабзэм зыщегъэужьыным хэлъхьэныгъэфI хуащIащ абыкIэ япэ гъуэгур пхызыша, Хэку зауэшхуэм и ветеран, цIыху гуащIафIэхэу Ахъмэт Щэлэуат, Джатэжьокъуэ Борис сымэ, Вындыжь Малил ягъусэу. Абыхэм къызэрагъэпэщауэ щыта оркестрыр щIыпIэ куэдым къыщацIыхуу щытащ. Иджы ар къызэрагъэщIэрэщIэжынум егугъунущ ЩэнхабзэмкIэ унэм и лэжьакIуэхэр.
БЭБЭЧ Башир.
