Россейде «Уллу перемена» атлы эришиу 2020 жылдан бери къыралны президентини буйругъуна тийишлиликде бардырылып келеди. Ол кеси да «Билим бериу» миллет проектни бир кесегине саналып, битеулю билим берген мектеплени бла колледжлени окъуучуларыны араларында бардырылады. Конкурсну къурагъанла уа «Россия – онгланы къыралы» деген АНО бла «Роспатриот ара» эмда Школчуланы россей къымылдауларыдыла.

Эришиуню мураты жаш тёлюге кесини хунерин баямларгъа эмда кёргюзтюрге онгланы къурауду. Бюгюнлюкде энди анга 900 минг чакълы адам къатышады. Ол санда уа бизни республикадан сабийлени да барлыкълары, ала анда жетишимле да болдура келгенлери кёллендиреди.

Бу жол а анга Нальчикни экинчи номерли лицейини онунчу классыны окъуучусу Хуболланы Жаннета да къатышханды. Былтыр къызчыкъ ары Къабарты-Малкъарны келечилерини арасында биринчи кере угъай, ючюнчю кере баргъанын да белгилерчады. Кеси да битеуроссей конкурсну экинчи даражалы лауреаты да болгъанды.

Андан сора да, Жаннета «Уллу переменаны» регион къауумуну координаторуну орунбасарыды. Ол республикада волонтёрлукъну айнытыуну ресурс арасыны келечисиди, КъМР-де Сабийни эркинликлери жаны бла уполномоченныйде Сабий жамауат советини таматасыды, «Биринчилени къымылдауларыны» амбассадоруду.

«Уллу переменагъа» эм алгъа Жаннета «Артек» лагерьге барыргъа, аны кеси кёрюрге эрттеден да мураты барлыгъы ючюн  биринчи кере жетинчи классда окъугъан кезиуюнде къатышханды. Алай бла ол жыл окъуна финалгъа тюшюп, «Артекни» кёрюрге да онг чыкъгъан эди. Ангылата кетейик, «Уллу переменаны» ахыр уруму бу лагерьде бардырылады эмда сабийле анда юч ыйыкъны ичинде турадыла.

Биринчи кере лагерьни кёргенинде, Хуболланы къызчыкълары анда тамаша табийгъатха сейир этгенди. Сабийлеге деп къуралгъан экскурсиялагъа да сюйюп къатышханды. Къабарты-Малкъардан а ол жол, Жаннетадан сора,  жаланда Азаматланы Алан баргъанды. Алай эсе да, ала бир къауумгъа тюшмегендиле. Эришиуню низамына тийишлиликде бир республикадан адамланы башха-башха къауумлагъа юлешедиле эмда кейследе берилген ишлени сабийле андан сора тамамлайдыла.

Жаннета конкурсха экинчи кере да къатышханында, аны жаланда жарым финалына ётгенди. Аны себепли баралмай къалгъанды «Артекге».

Белгилегенибизча, алгъаракъда да таулу къызчыкъ «Уллу переменагъа» къатышыргъа таукелленип, анда хорлагъанды эмда кёп болмай лагерьден къайтханды. Эришиуде болдургъан жетишими ючюн а жюзмингсомлукъ сертификат бла да саугъаланнганды. Бу жол а ол ары Дисана Тлехураева (Басхандан) бла баргъан эди. Кеси билдиргеннге кёре, конкурсда берилген жумушла тынч да тюйюлдюле, программасы иги да къыйын болуучуду.

Айтханыбызча, ол республикабызда Сабийни эркинликлери жаны бла уполномоченныйде Сабий жамауат советни башчысыды. Ары уа аны конкурс халда окъууда болдургъан жетишимлери эмда жамауат жашаугъа тири къатышханы ючюн сайлагъандыла. Советде да ол тюрлю-тюрлю проектле эмда программала жарашдырып, аланы жашауда бардырады, андан тышында да, тюбешиуле, жыйылыула къурайды. Сёз ючюн, ала алгъаракъда Нарткъалада Юйюрге бла сабийлеге социал болушлукъ этген республикалы арада болгъандыла. Ары уа ала, анда тургъанланы къууандырырча саугъаларын элтгенлеринден сора да, сахна оюнла, викторинала хазырлап барадыла. Сабийлеге уа ол, айхай да, зауукълукъду.

Федерал сабий жамауат совет (ФДОС) жыл сайын да мында бардыргъан тюбешиулеге Жаннета, айтханыбызча, дайым къатышханлай да турады, грантла да къытады. Ол школда да жаланда «бешлеге» окъуйду. Бирси ЕГЭ-лерине хазырланыргъа заманы асламыракъ къалыр ючюн, быйыл онунчу классны бошай туруп, математикадан Бир къырал экзаменин экстерн амал бла берип къояр муратдады. Кесини къайда билим алыргъа сюеригин алыкъа толусунлай сайлап къоймагъан эсе да, жамауат ишге эмда «Уллу перемена» эришиуге къатышханы анга жашауда не бла кюреширге сюйгенин ангыларча онг бергенлерин а жашырмайды.

Андан сора уа, ол стол теннисни жаратады. Спортну бу тюрлюсю бла биринчи классдан бери да кюрешеди. Ол дагъыда суратлау адабиятны сюеди, бегирег а классика чыгъармаланы окъуйду. Адам кесини ахшы муратларына жетер ючюн, алгъа талпыныргъа, итинирге кереклисин да чертеди.

Мокъаланы Зухура.