КъБР-м и Парламентым и Президиумым и зэIущIэм «Правительствэм хухах сыхьэтым» хыхьэу, депутатхэр тепсэлъыхьащ Къэ­бэр­дей-Балъкъэрым и къуажэхэм зэрызрагъэужьым.

ЗэIущIэр къыщызэIуихым, республикэм и хабзэубзыху IуэхущIапIэм и УнафэщI Егоровэ Татьянэ жиIащ «Къуажэхэм сыт и лъэны­къуэкIи зегъэужьын» къэрал прог­раммэм и фIыгъэкIэ, щэнхабзэ Iуэхухэр щрагъэкIуэкI жылагъуэ зэ­хуэсыпIэхэр зыхуей зэрыхуагъа-зэр, спорт ухуэныгъэхэмрэ сабий джэгупIэхэмрэ къызэрызэрагъэ­пэ­щыр. 
- АбыкIэ дыкъызэтеувыIэ хъунукъым. Лэжьыгъэшхуэ къытпэ­щылъщ къуажэхэм егъэджэныгъэмкIэ, узыншагъэр хъумэнымкIэ IэнатIэхэм зыщегъэужьыным, газрэ псыкIэ ахэр къызэрызэгъэпэщам ехьэлIауэ. ЗэфIэдгъэкIахэмрэ къэкIуэну илъэсхэм къуажэхэр зэредгъэфIэкIуэну Iэмалхэмрэ ды­тепсэлъыхьынырщ нобэрей ди зэхуэсыр зытедухуар, - къыхигъэщащ Егоровэм.
ЗэIущIэм къыщыпсэлъащ ­КъБР-м мэкъумэш хозяйствэмкIэ и министр Сыжажэ Хьэсэн. Абы жиIащ Къэбэрдей-Балъкъэрым и социально-экономикэ зыужьыныгъэр  зытещIыхьа Iуэхугъуэ нэхъыщ­хьэхэм къуажэхэм псэукIэр щегъэ­фIэ­кIуэныр зэращыщыр. Ахэ­­ращ мэкъумэшри промышленностым къы­щIигъэкIри нэхъыбэу здэщыIэр. Министрым къигъэлъэгъуащ щIыналъэм щып­сэум и зэхуэдитIым нэсыр зэры­къуажэдэсыр.  Абы къегъэлъагъуэ зи гугъу  ящIым и мыхьэнэр зэ­рыиныр. 
Сыжажэм жиIащ 2020 гъэ лъандэрэ ягъэзащIэ «Къуажэхэм сыт и лъэныкъуэкIи зегъэужьын» къэ-рал программэм егъэджэныгъэри, ­медицинэри, щэнхабзэ, спорт Iуэхухэри къызэрызэщIиубыдэр, псэу­кIэр зэIузэпэщ щыхъукIэ, къуа­жэхэм къыдэкIым зэрахэщIым. 
2024 гъэм Тырныауз къалэм ­щрагъэфIэкIуащ псыр зрикIуэ бжьамий километри 7,1-рэ, апхуэ­дэуи абы дэт школ-лицейм епха ­сабий гъэсапIэм и унэр зэрагъэ­пэщыжащ. Эльбрус жылэм къы­щызэIуахащ спорт IуэхущIапIэрэ тIысыпIэ 300 зиIэ ЩэнхабзэмкIэ унэмрэ. Щхьэлыкъуэ щаухуащ спорт IуэхущIапIэрэ футбол джэгупIэрэ. Псыхъурей, Къэхъун къуа­жэхэм щызэрагъэпэщыжащ автомобиль гъуэгуу метр 6800-рэ.

Нэгъабэ къэрал программэм къыщыгъэлъэгъуахэр ягъэ­зэщIэным хухахауэ щытащ сом мелуан 385-рэ, мы гъэм абы сом мелуан 608-рэ трагъэкIуэдэну я мурадщ. АдэкIи елэжьынущ олимп резервымкIэ спорт школыр, Сабий, ныбжьыщIэ творчествэм зезыгъэужь центрыр (Тырны­ауз къалэм) зэрагъэпэщы­жынымрэ Псыхъурейм ЩэнхабзэмкIэ и унэр ухуэнымрэ. 
IуэхущIэ щаублэнущ иджыри къуажитIым. Бахъсэнёнкэ ­къуажэм сабий гъэсапIэрэ (140 щIэхуэу) физкультурэ-узыншагъэр щрагъэфIакIуэ IуэхущIапIэрэ щаухуэнущ. ­КъищынэмыщIауэ, 2025 гъэм и кIэм нагъэсынущ спортри джэгупIэри щызэхэтыну щIы­пIэм, километр 11,5-рэ зи кIыхьахь псыжапIэм, ветеринар клиникэщIэм я ухуэныгъэхэр. Къэщкъэтау къуажэм къыщыщIадзэнущ «Кара-Суу - Бабугент - Къэщкъэтау» псыжапIэр ухуэным. Ар 2026 гъэм и кIэм яухын хуейщ.
Мы гъэм Къэбэрдей-Балъкъэрыр иджы япэу хэтынущ «Къуажэхэр зэIузэпэщ щIын» щIыналъэ Iуэхур гъэзэщIэ­ным. Абы ипкъ иткIэ социальнэ мыхьэнэ зиIэ IуэхущIапIищым и ужь ихьэнущ.
Къалэнхэм къыщытеувыIэм, министрым къыхигъэщащ рес­публикэр мы гъэм зэрыхэ­тынур «КъыщIагъэкIым и шынагъуэншагъэр» лъэпкъ Iуэ­хум «Мэкъумэш IэнатIэм и IэщIагъэлIхэр» и федеральнэ проектыщIэм. 2025 - 2027 ­гъэ­хэм а лъэпкъ Iуэхум тра­-гъэ­кIуэдэнущ сом мелард 1,5-рэ. Зэрагъэпэщыжынухэм ящыщщ Къэбэрдей-Балъкъэр къэрал Мэкъумэш универси­тетыр.
Сыжажэ Хьэсэн къызэщIикъуэжащ къуажэхэм зэрызрагъэужь къэрал программэм ипкъ иткIэ иужьрей илъэситхум зэфIагъэкIари. Абы къыхигъэщащ 2020 гъэм къы­щыщIэдзауэ 2025 гъэ пщIондэ ирагъэкIуэкIа Iуэхухэм псоми зэхэту сом меларди 3,7-м ­щIигъу зэрыхуэзар. 
Егоровэ Татьянэ жиIащ ­«Къуажэхэм я теплъэщIэр» гуэдзэным хиубыдэ жылэхэр нэхъыбэ щIын зэрыхуейр. 
КъБР-м и Парламентым Мэкъумэш хозяйствэмкIэ, щIыуэ­псыр къэгъэсэбэпынымкIэ, экологиемрэ дыкъэзыухъу­реихь дунеймкIэ и комитетым и унафэщIым и къуэдзэ Щхьэгъэпсо Сэ­фарбий щIэупщIащ мэкъумэш IэнатIэм епхауэ иужьрей зэманым къэунэху IэщIагъэ­­хэм зэрыхуагъэхьэ­зыр щIы­кIэм.
Министрым жиIащ а Iуэхум я нэIэ зэрытрагъэтыр икIи Къэ­бэрдей-Балъкъэрым къыщы­сэбэпынум нэхъ тегъэщIауэ зэман гъунэгъум IэщIагъэлI­хэр зэрагъэхьэзырынур. Псом хуэмыдэу зи гугъу ящIыр мэкъумэш туризмым, республикэм кIуэ пэтми щагъэбагъуэ жызум хадэхэм щылэжьэнухэр, псыщIэгъэлъадэм хэ­зыщIыкIхэр, зоотехникхэр, агрономхэр гъэхьэзырын зэры­хуеинурщ. Апхуэдэуи респуб­ликэм и школхэм къы­щы­­­зэ­рагъэпэщыну я мурадщ мэкъу­мэш Iуэхум щыхагъэ­гъуазэ классхэр. 
КъБР-м и Парламентым хэт «Захуагъэ здэщыIэ Урысей - Пэжым и телъхьэу» фракцэм и унафэщI Кебеков Владимир Анзорей къуажэм дэт ЩэнхабзэмкIэ унэр кхъахэ зэрыхъуам гу лъатэну къыхилъхьащ. 
Депутатхэр щIэупщIащ ­КъБР-м и мэкъумэш IэнатIэм хухах мылъкум, дунейм и щы­тыкIэр гъавэм зэран хуэ­хъунымкIэ щыIэ шынагъуэм, нэгъуэщIхэми.
КъБР-м и Парламентым ­Мэкъумэш хозяйствэмкIэ, щIы­уэ­псыр­ къэгъэсэбэпыным­кIэ, экологиемрэ дыкъэзыухъу­реихь дунеймкIэ и комитетым и унафэщI ТекIушэ Артур жиIащ къуажэхэм зэрызрагъэужьым хэплъэныр КъБР-м и Iэтащхьэм республикэм и ­хабзэубзыху IуэхущIапIэм Зэ­рызыхуигъазэм хыхьэу къызэ­рыхалъ­хьар. 
ЗэIущIэм къыщаIэта Iуэху­гъуэхэр къэлъытауэ, КъБР-м    и Парламентым и Президиу­мым унафэ къищтащ. 

КъБР-м и Парламентым и пресс-IуэхущIапIэ.