Афган зауэр щекIуэкIа илъэсхэр хуэмурэ тпэжыжьэ мэхъу. Ауэ Хэкум къащищIа къалэныр ягъэзэщIэн папщIэ зи гъащIэми щымысхьа ди щIалэхэм я лIыхъужьыгъэмрэ хахуагъэмрэ цIыхухэм ягу ихуркъым.
КъБР-м къэрал кIуэцI IуэхухэмкIэ и IэнатIэхэм епхауэ зауэхэм хэта ветеранхэм я зэгухьэныгъэм, Афганистаным ныкъуэдыкъуэ щыхъуахэм я урысейпсо жылагъуэ IуэхущIапIэм и щIыналъэ къудамэм я унафэщIхэмрэ къэрал кIуэцI IуэхухэмкIэ IэнатIэхэм я ветеран, зауэлI Былымгъуэт Беслъэнрэ я жэрдэмкIэ, илъэс ебгъуанэ хъуауэ Налшык къалэм щокIуэкI «Фэеплъым и шэху уэздыгъэ» зэхыхьэр. Ар ирагъэкIуэкIын щыщIадза япэ илъэсым абы къэралым и щIыналъэ зыбжанэ хыхьауэ щытауэ аращ. Иджыпсту «Фэеплъым и шэху уэздыгъэр» щIыналъэ 20-м къыщызэрагъэпэщ.
Афган зауэм хэкIуэдахэм я фэеплъу Налшык къалэм дэтым деж щрагъэкIуэкIа пэкIур даIыгъащ Налшык къалэм и щIыпIэ администрацэм, Зауэм, лэжьыгъэм, IэщэкIэ зэщIэузэда къарухэмрэ хабзэхъумэ IэнатIэхэмрэ я ветеранхэм я къалэ советым, КПРФ-м и республикэ, къалэ комитетхэм, Къэбэрдей-Балъкъэрымрэ Налшыкрэ къэрал кIуэцI IуэхухэмкIэ и ветеранхэм я советхэм, Афганистаным и ветеранхэм я зэгухьэныгъэм, «Боевое братство» жылагъуэ IуэхущIапIэм, Налшык къалэм дэт курыт еджапIэ №7-м и кадет классхэм щеджэхэм, нэгъуэщIхэми.
УэрэдымкIэ «Элви-шоу» школым и гъэсэн, Налшык дэт лицей №2-м и еджакIуэ Атэбий Албэч «Встанем» уэрэдыр игъэзащIэу пэкIур къызэIуахащ.
Былымгъуэт Беслъэн къызэхуэсахэм ягу къигъэкIыжащ Къэбэрдей-Балъкъэрым щыщу цIыху 1860-м я къалэныр пщIэ пылъу Афганистаным зэрыщагъэзэщIар, абыхэм ящыщу 54-р зэрыхэкIуэдар, 200-м щIигъу уIэгъэ хъуауэ зэрыщытар, зауэр иуха нэужь, 400-м щIигъу дунейм зэрехыжар. Я хахуагъэмрэ лIыгъэмрэ папщIэ, ди лъахэгъуу 3-м къыхуагъэфэщащ Бэракъ Плъыжь орденыр, 112-м - «Вагъуэ Плъыжь»-р, «И хахуагъэм папщIэ» медалыр - 870-м, «Зауэм щиIа фIыщIэхэм папщIэ» медалыр зауэлI 907-м иратащ.
«Илъэс 80 и пэ, ди адэжьхэм нэмыцэ зэрыпхъуакIуэхэр къызэтрагъэувыIауэ щытащ, абыкIэ ди гъащIэ мамырыр тхуахъумауэ. Ауэ нацист псори мыкIуэдауэ къыщIэкIащ. Мы зэманым ди щIалэхэр Украинэм щекIуэкI дзэ Iуэху хэхам хэтщ, апхуэдэ залымыгъэ зезыхьэхэм япэщIэту. Ди фIэщ мэхъу текIуэныгъэр къахьу мыгувэу ахэр я унэ къызэрекIуэлIэжынур. Зи къулыкъур зыгъэзащIэу хэкIуэда ди щIалэхэм я фэеплъым пщIэ хуэтщIыну дызэхуэсауэ аращи, ахэр зыщыдмыгъэгъупщэным ди гупсысэр тедухуэн хуейуэ къызолъытэ» - жиIащ Былымгъуэтым.
Афган зауэм хэкIуэдахэм дакъикъэкIэ яхуэщыгъуащ. ПэкIум къыщыпсэлъащ Зауэм, лэжьыгъэм, IэщэкIэ зэщIэузэда къарухэмрэ хабзэхъумэ IэнатIэхэмрэ я ветеранхэм я Налшык къалэ советым и унафэщI Абдулаев Мустэфа, КъБР-м и Парламентым и депутат, КПРФ-м и Къэбэрдей-Балъкъэр щIыналъэ къудамэм и япэ секретарь Пащты Борис сымэ, нэгъуэщIхэри.
КъБР-м ис муслъымэнхэм я дин IуэхущIапIэм и унафэщIым и япэ къуэдзэ Мисиров Хъызыр къызэхуэсахэм дыуэ яригъэщIащ. Афган зауэм хэкIуэдахэм папщIэ шэху уэздыгъэ 54-рэ щIагъэнащ.
БАГЪЭТЫР Луизэ. Сурэтыр Къарей Элинэ трихащ.
