Элбрус районну Къулийланы Къайсын атлы маданият юйюню арбазы мудахды.  Жамауат а келеди, алай аланы сезимлери да жарыкъ тюйюлдюле. Биз кесибиз да алайыракъбыз. Мында бюгюн  жашауундан замансыз кетген огъурлу таулу жаш Борчаланы Магометни жашы Мухтарны  хурметине аталгъан эсгериу ингир болады. Мудахлыкъ да аны ючюндю. Борчаланы тукъумну келечилери аз-аздан келедиле, энди зал да толгъанды. Огъурлу адамланы жашау жоллары былай къысха нек болуп къалады? Баям, ким да къадар кюнюне дери жашай болур. Мухтар да дуниядан кетгенли быйыл 9 жыл болады. Алай ол не тюрлю болса да, болушлукъ этгенле, аны бла шуёхлукъ жюрютгенле, тенглери да Мухтарны жаланда иги жаны бла эсгередиле. «Аны жюреги къачан да ачыкъ эди, ол ишден къоркъмагъан, жандауурлукъгъа жашауунда энчи эс бургъан адам эди», - деп эсгередиле аны таныгъанла.

Мухтар 1965 жылда Тырныаууз шахарда туугъан эди. Мектепни бошап, Москвада Тау-металлургия университетге окъургъа киреди. Аны жетишимли бошап, тау инженер усталыкъны алып, кесин болмагъанча мадарымлы, билимли жашча танытады. Ол жыллада «МАЛС» жабылгъан акционер биригиуню таматаларындан бири болуп, къурулуш жаны бла къыралны излемлерин жалчытыуда тийишли жерге чыгъады. Ызы бла сатыу-алыу ачыкъ акционер биригиулени къураучусу болады. 

Аны къысха жашауу адамлыкъны, жууаплылыкъны, ётгюрлюкню бла фахмуну юлгюсю болгъанды.  Къайсы ишни къолгъа алса да, анга саулай жюреги бла берилгенди.Аны себепли болур, тёгерегине кесича урунуугъа итиннген, анга чексиз ышаннган, хурмет эте билген адамла жыйылгъан эдиле. Алай ол жерлешлерин, Туугъан жерин бир заманда да унутмагъанды, не уллу даражада бардырыллыкъ ишлеге да спонсор болушлукъ этгенди. Алай бла, кеси заманында Тырныауузда бардырылгъан боксдан интерконтиненталь даражалы турнирге болушлукъ этген эди. Анда бизни жерлешибиз, ёхтемлигибиз, жашауундан замансыз кетген Доттуланы Ахмат ишексиз хорламгъа тийишли болгъан эди. Ол турнирни бизде ётгени да бошдан болмагъанды. Борча улу кесини таула арасында орналгъан, гитче болса да, ёхтем шахарын саулай дуниягъа белгили эталгъанды.

Билим алыргъа сюйген жаш тёлюге къачан да билеклик этерге итиннгенди. Алай бла жаш тёлюню айнытыугъа болушлукъ этген «Эльбрусоид» фонд бла къаты байламлыкъ жюрютгенди. Не да болсун, хунери, фахмусу болгъан сабийлерибизни тунчукъдурмай, аланы искусство, спорт жаны бла да бийик даражалагъа итиниулерине болушханды.

«Мюлк ючюн жашагъан адам, ахыр тылпыуу бла хар нени да тас этип, жангыз, къуру къалады. Адамлыкъ бла жамауаты ючюн жашагъанны аты уа ёмюрлеге сакъланады!» Бу сёзлени бла юлгюню толусунлай Борчаланы Магометни жашы Мухтаргъа жораларгъа боллугъун аны тенглери, биргесине школда окъугъан шуёхлары уллу хурмет эте айтхандыла. Борча улу жашауунда жууукъларыны, тенглерини, саулайда шахарыны бла миллетини жашауун игиге тюрлендирирге итине эди.

Къалай насыпды, жашауу къысха болса да, быллай уллу даражагъа тийишли болургъа жетишген! Сахнагъа чыгъып сёлешгенле барысы да тенглерин бек тансыкълагъандыла. Къаллай бир заман озса да, аны аты тёлюледе сакъланырын айтхандыла.

Борчаланы тукъумуну атындан Борис хар бери келип, Мухтарны атын ариулукъ, игилик бла сагъыннганлагъа, келалмай къалып, кенгден хурметлегенлеге да уллу ыспас этгенди. Тукъумну атын быллай огъурлулукъ бла айтдыралгъан жаш Борча улу болгъаны бла ёхтемленнгенлерин да чертгенди.

Андан сора да, келалмай къалгъан Тоторкъулланы Алийни видео амал бла эсгериулерин, хурметин да билдирген роликни кёргюзтгендиле. Борчаланы Мухтарны эсгерирге келгенлени Россейде, кеси эм къоншу  республикалада да белгили болгъан артистлерибиз Мухтар Хордаев, Газаланы Алим, Тёппеланы Алим, Атайланы Динара, Акъболатланы Фатима бла Жаникаланы Эльдар, «Салам» тепсеу къауум ариу жырлары бла, тепсеулери бла да кёллерине жеталгъандыла. Районну къуллукъчулары уа сахнада Мухтарны сыйына хурмет этип келгенлени барысына да ыразылыкъларын билдиргендиле.

Огъурлу ишлени заман тунчукъдуралмайды. Ала юлгю болуп, тёлюлеге къаладыла. Борчаланы Магометни жашы Мухтарча болургъа бизни кёп жашларыбыз бла къызларыбыз итинирик сунабыз.

- Тырныауузгъа къачан да сюйюп келиучюбюз. Бюгюннгю ингирни уллу юйретиу, хурметлеу да магъанасы болгъанды. Таулу деген атын ёхтем жюрютюп, миллетини ийнагъы болалгъан Мухтарча жашны эсгериуюбюз мени бир жаны бла мудах этгенликге, бирси жаны бла ёхтемлендиргенди. Аны жерлешлерине, тукъумуна, тенглерине да ыспас этеме. Игилик  ёлюмсюздю дерге сюеме деп, кеси сезимлерин бизге аламат жырчыбыз Тёппеланы Алим да билдиргенди.

Темуккуланы Асият.