Кёп болмай  Тырныауузну Къулийланы Къайсын атлы  Маданият юйюнде Борчаланы Мухтар туугъанлы 60-жыллыгъына аталгъан жыйылыу болгъанды, деп билдириледи Элбрус районну администрациясыны пресс-службасындан. 

Борча улу кёп жылланы  «Малс» корпорациягъа башчылыкъ этгенди, адамланы эслеринде  таза ниетли, чомарт  инсанча  къалгъанды. Ол себепден аны эсгерирге кёпле келгендиле: жууукъ-ахлулары, шуёхлары, учрежденияланы, биригиулени таматалары эм башхала. Сыйлы  къонакъланы араларында КъМР-ни Парламентини депутатлары Сотталаны Къурман, Мечукаланы Алийхан, Текуланы Амырбий, Черек районну администрациясыны башчысы Къулбайланы Алан, Элбрус району администрациясыны башчысыны къуллугъун толтургъан Отарланы Мухтар да болгъандыла.

Борчаланы Мухтарны жашаууну, ишини юсюнден аны иги таныгъан шуёхлары эм жууукълары да  хапарлагъандыла. Ол санда   Чукотск  автоном округну  губернатору Александр Назаров, муниципалитетни физкультура эм спорт жаны бла комитетини председатели Жаппуланы  Магомет,  классыны таматасы  Ольга Третьякова,  «Эльбрусоид» фондну президенти Тоторкъулланы  Алий,   Москваны управление  университетини  «Финансла эм  кредит» кафедрасыны  доценти Тилланы  Арсен эм башхала да жерлешибизни жюрек жылыулукъ бла эсгергендиле.  

Келгенлеге ыразылыкъларын билдире, Мухтарны туугъан къарындашы Барасбий, къысха жууукълары  Беккиланы Омар бла аны эгечи Зулейха да сёлешгендиле.

Къабарты-Малкъарны белгили артистлери бла Элбрус районну чыгъармачылыкъ биригиулери уа жырлары, тепсеулери бла да жыйылгъанланы  кёллерин кётюргендиле.