Къэ­бэрдей-Балъкъэр Республикэм и Жылагъуэ палатэм и еханэ зэхыхьэ­гъуэм хэтхэм КъБР-м и Iэ-тащхьэ КIуэкIуэ Казбек  яхуэзащ. ЗэIущIэм щытеп-­сэ­лъыхьащ иужьрей    илъэсищым ирагъэкIуэкIа лэ­­­жьыгъэм, адэкIэ къапэщытхэм.

Граждан жылагъуэм и щIыналъэ институтым и лэ­жьыгъэ нэхъыщхьэм теп­сэ­лъыхьащ КъБР-м и Жыла­гъуэ палатэм и унафэщI Берд Хьэзрэталий. Я нэIэ щIэт Iуэхухэр зэрекIуэкIым и гугъу ящIащ Жылагъуэ палатэм и тхьэмадэм и къуэдзэ Федченкэ Людмилэ, палатэм и комиссэм социальнэ политикэмкIэ, узыншагъэр хъумэнымкIэ, физическэ щэн­хабзэмрэ спортымкIэ и унафэщI Шинкаревэ На­талье, палатэм и комис-    сэм щэнхабзэмкIэ, псэкуп- сэ щIэи­­ныр хъумэнымкIэ, хъыбарегъащIэ IэнатIэхэмкIэ и унафэщI Мэзукъэбз Аслъэн, Шэрэдж щIыналъэм и жылагъуэ палатэм и тхьэмадэ Чеченов Георгий сымэ.
Республикэм и Жылагъуэ палатэр и IуэхущIафэр къы­зэрызэгъэпэщакIэ, зэIухауэ зэрыщытымкIэ къэралым ­нэхъыфIу къыщалъытаи   10-м ящыщщ. 2024 гъэм абы Урысейм и президент хэ­хыныгъэхэр щекIуэкIым жы­лагъуэ кIэлъыплъыныгъэхэр къызэгъэпэщынымкIэ лэжьыгъэшхуэ зэфIигъэкIащ. Жылагъуэ кIэлъыплъакIуэу 900-м нэблагъэ - егъэджа­кIуэхэр, гъэсакIуэхэр, сту­дент­хэр, хьэры­чэ­ты­щIэ­хэр, пенсионерхэр, волонтерхэр - республикэм хэхыныгъэхэр хабзэм тету зэрырагъэкIуэ­кIым кIэлъыплъу щыIащ хэ­хыпIэ щIыпIэхэм. Нэгъабэ и бжьыхьэм КъБР-м и Жы­лагъуэ палатэм ди Президент Путин Владимир къыбгъэдэкI ФIыщIэ тхыгъэ къы­Iэ­рыхьащ.
Жылагъуэ палатэм и къалэн нэхъыщхьэу къонэж лъэпкъ проектхэмрэ къэрал программэхэмрэ зэрагъэзащIэр, урысей псэкупсэ-гъэсэныгъэ лъапIэныгъэ нэхъыщхьэхэр хъумэныр жы­лагъуэ кIэлъыплъыныгъэм щIи­гъэтыныр.
ЗэIущIэм  щытеп­сэ­лъы­хьащ Хэку зауэшхуэм и къэхъугъэ­хэмрэ и лIыхъужь­хэмрэ я тхыдэ фэеплъыр хъу­мэным, худэчых зиIэ цIы­хухэр хущ­хъуэкIэ къызэгъэ­пэщыным, экологие шына­гъуэншагъэм, псэупIэ-коммунальнэ хозяйствэм, республикэм и жылагъуэхэр зэ­­Iузэпэщ щIыным, бюджет IуэхущIапIэхэр ухуэ­ным, зы­хуей хуэзэу зэгъэ­пэ­щы­жы­ным, нэгъуэщIхэми теухуа Iуэ­хухэм.
- Республикэм и граждан жы­лагъуэм, Къэбэрдей-Балъкъэрым къыпэщыт жылагъуэ-политикэ къалэнхэр зэфIэхынымкIэ щыIэ, мылъкум темылажьэ IуэхущIапIэхэм зегъэужьыным хуэунэтIауэ зэгъусэу едгъэ­кIуэкI Iуэхум адэкIи къы­пыт­щэнущ, - жиIащ КIуэкIуэ ­Казбек.