Налшык ЩIалэгъуалэм я унэм щагъэлъэпIащ гъэ къэс къызэрагъэпэщ «ЩIыналъэр зэрыгушхуэхэр» саугъэтыр зыхуагъэфэщахэр. Ахэр зыпхыкIа зэпеуэр къызэригъэпэщащ КъБР-м и ЩIалэгъуалэм я зэгухьэныгъэм, республикэм ЩIалэгъуалэм я IуэхухэмкIэ и министерствэр и дэIэпыкъуэгъуу.

Саугъэтыр хуагъэфэщащ зи IэнатIэм къыщыхэжаныкIа щIалэхэмрэ хъыджэбзхэмрэ. ЯгъэлъэпIахэм ящыщщ хьэрычэтыщIхэр, дохутырхэр, егъэджакIуэхэр, спортсменхэр, тхакIуэхэр, волонтёрхэр, щэнхабзэм и лэжьакIуэхэр, нэгъуэщIхэри.

Зэпеуэм и япэ Iыхьэм цIыхуи 100-м щIигъу хэтащ. ЦIыхубэ IэIэтым пхыкIар цIыху 50-щ. ТекIуахэр къэпщытакIуэхэм я мызакъуэу, щIыналъэм щыпсэухэм къыхахащ, интернет IэIэтыр къагъэсэбэпри. Я зэфIэкI щеплъыжащ: «Выбор молодежи», «Артист года», «Мастер своего дела», «Волонтер года», «Лидер сообщества», «Друзья КБР», «Хранитель культуры», «Ключевое слово», «Спортсмен года», «Молодой ученый» жыхуиIэхэмкIэ.

- Ди къэралым щIалэгъуалэм гулъытэ ин щыхуащI. ЩIыналъэ псоми щIалэгъуалэ центрхэр, IуэхущIапIэхэр щаухуэ. Гуапэщ нобэ гъащIэм нэ жанкIэ еплъ, зэфIэкIрэ жэрдэмрэ зиIэ мыпхуэдиз щIалэгъуалэ жыджэр зэрызэхуэсар! Фи мурад пхывгъэкIыну, щIэ гуэрхэр къызэвгъэпэщыну, фи хъуэпсапIэхэр зэвгъэхъулIэну ерыщу фызэрыхущIэкъум папщIэ дэтхэнэми фIыщIэ фхуэфащэщ. Дзэ Iуэху хэхам щыIэхэмрэ абыхэм я унагъуэхэмрэ фазэрыдэIэпыкъури гуапэщ. Сыщыгъуазэщ ТекIуэныгъэ Иныр къызэрытхьрэ мы гъэм илъэс 80 зэрырикъум теухуа зэхыхьэхэр къызэгъэпэщыным жыджэру фызэрыхэтми. Иджыри зэ фIыщIэ фхузощI Урысейм щыпсэу лъэпкъхэм я зэкъуэтыныгъэм хэлъхьэныгъэфI зэрыхуэфщIым папщIэ! – жиIащ КъБР-м и Правительствэм и УнафэщIым и къуэдзэ Къуэшырокъуэ Залым.

Къуэшырокъуэм зэхьэзэхуэм и саугъэтыр зыхуагъэфэщахэм яритыжащ.

КъБР-м и Парламентым и УнафэщIым и къуэдзэ Къардэн Мурати текIуахэм захуигъэзащ я ехъулIэныгъэхэм дияпэкIи хагъэхъуэну икIи фIыщIэ яхуищIащ жылагъуэм зегъэужьыным щIалэгъуалэм я зэфIэкI зэрыхалъхьам папщIэ.

ТЕКIУЖЬ Заретэ.