Республиканы аскер комиссариатындан энчи аскер операциягъа къатышхан аскерчилерибизге кезиулю гуманитар жюк ашырылгъанды. Аны юсюнден редакциягъа «Аскер къарындашлыкъ» жамауат биригиуню регион бёлюмюню таматасы Гелястанланы Барасбий билдиргенди.
Энчи аскер операция бардырылгъан жерлеге эки жюк ташыгъан автомашинагъа кёгетле, продуктла, татлы суула, кёп заманны бузулмай сакъланнган ашарыкъла, дарманла эм жуукъгъан ауруулагъа къажау химия затла жюкленип ашырылгъандыла. Башда сагъынылгъан жюкню къураргъа «Аскер къарындашлыкъ» жамауат биригиу, волонтерла, Муаед Пиховну башчылыгъында КъМР-ни МВД-сыны ветеран къаууму, автомашиналагъа ремонт этерге окъутхан колледж тири къатышхандыла.
Гелястан улуну айтханына кёре, кезиулю гуманитар жюкню жыяргъа бек алгъа аланы эслерине келген эди. Ол хапарны эшитгенлей, башда эсгертилген шуёхлары, алагъа ыразылыкъларын билдирип, бир кибик билеклик этгендиле.
«Дагъыда военкоматны оноучулары да бизге иги болушлукъ этедиле. Энчи аскер операция бардырылгъан жерлеге жюкню аскерчиледен ашырсанг, хар зат да жерине жетмей къалмайды. Къоркъуусузлукъ жаны бла да аскерчиле баргъан колоннагъа бек ышанабыз, аскер частьны таматасы бла келишгенден сора, бизни автомашинабыз аланы тизгинлерине къошулуп, жолгъа алай тебирегендиле»,-деп белгилегенди Гелястанланы Борис.
Белгилерчады, «Аскер къарындашлыкъны» Куба элде бёлюмю бир тонна картоф, аллай бир да хобуста, тюрлю-тюрлю суула, 300 килограмм ун келтиргенлерин. Жюкню къурагъан кезиуде анга къатышханланы араларында болмагъанча бирлик, этиллик жумушну магъанасын барысы да бирча ангылагъанла болгъандыла. Дагъыда СВО-да тургъан аскерчилеге республикалы газетлени да иги кесеги ашырылгъанды.
