КъМР-ни Башчысы Казбек Коков республиканы Правительствосуну къаууму бла жыйылыу бардыргъанды. Анда сёз 2025 жылда миллет проектлени бла къырал программаланы жашауда бардырыуда белгиленнген жумушланы тамамлауну юсюнден айтылгъанды. Аны юсюнден КъМР-ни Башчысыны бла Правительствосуну пресс-службасы билдиреди.
Кенгешде сёз къурулуш ишле, инфраструктура проектле, эллени комплексли айнытыу бла байламлы алыннган программала бардырылгъан жерледе иш тири барырча къурауну, «Жаш тёлю эм сабийле» деген миллет проектни регион бёлюмюн толтурууну эмда бюджет бёлюмде уруннганланы иш хакълары тутхучлу халда ёсе барырча онгла къурауну юсюнден баргъанды.
Быйылгъы жылда Къабарты-Малкъар онеки миллет проектни тамамлаугъа къатышады, аланы жашауда бардырыугъа тогъуз миллиард сомдан аслам бёлюнюрюкдю. Жыйылыуда 2025 жылда эмда 2026-2027 жыллада этиллик ишлеге да къаралгъандыла.
Юч жылгъа къабыл этилген бюджетге кёре, билим бериуде, саулукъ сакълауда, спортда, жол мюлкде, эл мюлкде, социал жаны бла ишленирик объектледе, инженер эм жашау мюлк-коммунал инфраструктурада, турист бёлюмде эм битеу да эки жюзден аслам объектде къурулуш ишле бардырыллыкъдыла.
Жаланда билим бериуде окъуна 65 мектепни тынгылы жангыртыргъа мурат барды, андан сора 147 билим берген учреждение «Ата журтну къоркъуусузлугъун къоруулау» эм «Урунуу» (технология) деген предметледен окъутурча керек затла жалчытылынырыкъдыла.
Бюгюнлюкде аслам эс бюджет бёлюмде уруннганланы иш хакъларына бурулады. 2021 жылдан бери жыл сайын аланы иш хакълары 10 процентге кётюрюледи. Ол кезиуню ичине КъМР-ни бирикдирилген бюджетде иш хакъны тёлеу фонду 15,6 миллиард сомдан 26,5 миллиард сомгъа жетгенди. Башхача айтханда, ёсюм 1,7 кере болгъанды. Аллай иш хакъны алгъанланы саны 42 минг адамгъа жетгенди. Бу ишни селейтмей бардырыргъа тийишли онгла да бардыла.
«Аны бла бирге биз ишни алгъа бардырырча толтурлукъ борчланы салыргъа керекбиз. 2025 жыл битеу бёлюмледе эм къыйматлы болургъа керекди. Битеу министерстволаны эм ведомстволаны оноучуларына ишни тирилтирге буюруу бергенме, аллыбызда тургъан борчланы толтурур ючюн къадалып ишлерге эм жангы жетишимле болдурургъа кереклисин эсгертгенме», – деп белгилегенди республиканы Башчысы.
