УФ-м щIыхь зиIэ и сурэтыщI, КъБР-м и цIыхубэ художник,  ХудожествэхэмкIэ Урысей Академием хэт, Санкт-Петербург щыпсэу икIи щылажьэ ди ­хэкуэгъу сурэтыщI цIэрыIуэ Сэв­кIуий Хьэмид и лэжьыгъэ­хэр щагъэлъагъуэ Художес­т­вэ­хэмкIэ Урысей Академием. «Гу» зыфIаща выставкэмкIэ зэхуа­щIыж художникыр илъэс 60 зэрырикъум и щIыхькIэ къызэ­ра­гъэпэща Iуэхухэр. Абы ехьэ­лIауэ зэхыхьэ гъэщIэгъуэнхэр Налшыки щекIуэкIауэ щытащ.

Гъэлъэгъуэныгъэм хагъэ­хьащ иужьрей илъэсипщIым Сэв­кIуийм и Iэдакъэ къыщIэкIахэм ящыщ сурэт 70-м щIигъу, ­скульптурэ 30. Апхуэдэу абы щагъэлъагъуэ классикхэм я тхыгъэ­хэм къытрищIыкIа, IуэрыIуатэр зи лъабжьэ и графикэ лэжьыгъэ­хэри.
Хьэмид и лэжьыгъэхэр Кавказым ис лъэпкъхэм я мыза­къуэу, къэралым, дуней псом щафIэхьэлэмэтщ. 
СэвкIуий ­Хьэмид Къэбэрдей-Балъкъэрым иIэпхъукIыу Къэзахъстаным и Джамбул къалэм щыпсэуа адыгэ унагъуэм 1964 гъэм къыщалъхуащ. 1979 гъэм ар Налшык къэIэпхъуэжащ. Су­рэтыщI цIэрыIуэ Сындыку Анатолэ и ­лъэщапIэм щIэх-щIэхыурэ зэ­ры­кIуэм къыхэкIыу а IэщIагъэм ди­хьэхащ Хьэмид. ЯпэщIыкIэ ар щеджащ Ставрополь пединститутым и художественно-графикэ факультетым, иужькIэ живописымкIэ, скульптурэмрэ архитектурэмкIэ Репиным и цIэр зэ­рихьэу Санкт-Петербург дэт институтым монументальнэ живописымкIэ и къудамэм. 
ЕгъэджакIуэхэм я лэжьыгъэ­хэм я гъэлъэгъуэныгъэ институ­тым къыщызэрагъэпэщхэм 1996 гъэм щыщIэдзауэ Хьэмид и Iэ­дакъэ къыщIэкIахэри илъэс къэс хегъэхьэ. Абы гъуазджэм и лIэу­жьыгъуищым - графикэм, живописым, скульптурэм - ехъулIэныгъэфIхэр щызыIэригъэхьащ.
1997 гъэм Къэбэрдей-Балъкъэ­рым и Парламентымрэ Прави­тельствэмрэ я унэхэм папщIэ ­игъэхьэзыращ «Иван Грозный принимает кабардинскую делегацию», «Выход пахарей» декоративнэ лэжьыгъэхэр. 
2000 гъэм Барселонэ (Испание) щекIуэкIащ абы и лэжьыгъэхэм я гъэлъэгъуэныгъэ. ­ 2002 - 2006 гъэхэм (живопись, графикэ, пхъэм къыхэщIыкIа ­скульп­турэхэр) Нидерландхэм (Амстердам, Гаудэ) и «Goda» гале­реем. Москва, Санкт-Петербург Самарэ жыпIэми, нэгъуэщI къалэхэми щIэупщIэшхуэ щиIэу щекIуэкIащ Хьэмид и выставкэхэр. Ар хэтащ Урысейм и сурэтыщIхэм я гъэлъэгъуэныгъэу Китайм къы­щы­зэ­ра­гъэ­пэ­щам, урыс щэнхабзэмкIэ Ни- дерландхэм щекIуэкIа фес­ти­валым. 
СэвкIуий Хьэмид и Iэдакъэ къы­щIэкIащ Къэбэрдей-Балъ­къэ­рым и япэ Президент КIуэкIуэ Валерэ и фэеплъыр. Ар Къэбэрдей-Балъкъэр къэрал мэкъумэш университетым и пщIантIэм  2007 гъэм щагъэуващ.
Урысейм и СурэтыщIхэм я зэгухьэныгъэм 1996 гъэм СэвкIуийр хагъэхьащ. А гъэ дыдэм къыхуагъэфэщащ Художест­вэ­хэмкIэ Урысей Академием и ЩIыхь тхылъыр. 1999 гъэм ме­даль тыгъэ къыхуащIащ Москва КъегъэлакIуэ Христос и цIэр зезыхьэ и члисэр къэгъэщIэ­рэ­щIэжыным хэлъхьэныгъэфI зэ­ры­хуищIам папщIэ. 2005 гъэм ­ХудожествэхэмкIэ Урысей Ака­демием и дыжьын медалыр ­къы­хуагъэфэщащ. 2007 гъэм ­ХудожествэхэмкIэ Урысей Ака­-демием и член-корреспондент цIэр къыфIащащ. 
СэвкIуий Хьэмид и лэжьыгъэ телъыджэхэр щахъумэ къэралым и музейхэм, Урысейм, Китайм, Испанием, Нидерландхэм, Германием, нэгъуэщI щIыналъэ­хэм щыпсэууэ абы и Iэдакъэ   къы­щIэкIахэм дихьэххэм я уней гъэтIылъыгъэхэм хэлъщ. 2000 гъэм щыщIэдзауэ Хьэмид  Санкт-Петербург Художествэ-хэмкIэ и академием живопи-сымкIэ и ­факультетым сурэт щIынымкIэ и къудамэм щре­гъаджэ. Зи хэкуэгъухэр зыщызы­мыгъэгъупщэ су­рэтыщIым и лэжьыгъэхэр нэхъыбэу зытеу­хуар и лъэпкъым и тхыдэрщ, и ­къекIуэкIыкIарщ, и щIыналъэм и щIыуэпс къулейрщ, нобэрей гъащIэм и лъапIэныгъэхэрщ. Хьэмид и лэжьыгъэхэм гупсысэ ­куурэ купщIэ инрэ ящIэлъщ. СурэтыщIыр щIэх-щIэ­хыурэ Налшык къокIуэж икIи и ­гуапэу хэтщ ди щIыпIэм щекIуэкI щэнхабзэ, гъуазджэ зэхыхьэхэм, гъэлъэ­гъуэныгъэхэм. СэвкIуийм и Iэ­щIагъэм, и зэфIэкIым и лъэп­-къэ­гъухэр дрогушхуэ, ди щхьэр лъагэу дегъэлъагъуж.
ТЕКIУЖЬ Заретэ.