Заповедниклени бла миллет паркланы кюнюн белгилеуню чегинде Приэльбрусияда «Эльбрус» курортну айнытыу бла байламлы жыйылыу болгъанды. Анга Россейни Табийгъат байлыкъла эмда экология министерствосуну энчи сакъланнган табийгъат жерлени жаны бла къырал политиканы бардырыу бёлюмюню башчысы Ирина Маканова, курортла эм туризм министр Мурат Шогенцуков, аны орунбасары Шауаланы Ислам да къатышхандыла. Жыйылыуну «Кавказ.РФ» обществону башчысы Андрей Юмшанов бардыргъанды.

Айтылгъаныча, курортну бла «Приэльбрусие» миллет паркны жерлери бир бири юслери бла ётгенлери ючюн тамамланылыргъа тийишли кезиуле чыгъадыла. Эс туристле 4 минг метрден бийикге чыкъгъан жерлеге къараугъа, миллет паркда адамланы солууларын къурауну планын жарашдырыугъа, турист жолчукъланы тапландырыугъа бёлюннгенди.

 Жыйылыугъа дери уа анга къатышханла, 5100 метр бийикликге кётюрюлюп, чыранны сакларча мадарланы эм ёрлеулеге деп къуралгъан   амалланы тинтгендие.

Кульчаланы Зульфия.