Шимал Кавказны айнытыу жаны бла Кавказ. РФ институтдан  билдиргенлерича, быйыл Элбрусда эски пассажир  маятник канат жолну   жангыртыргъа белгиленеди. 
Канат жол 1969 жылдан бери ишлейди. Кёп жылланы ичинде  къызыл «кюбюрчюкле»  Элбрус курортну белгиси болгъандыла. Ала Азау таладан  «Кругозор», «Мир» эм 3720 метр бийкликде орналгъан   «Гара-Баши» станциялагъа дери кётюрюледиле.  Алагъа 25 адам сыйынады эм бир сагъатха 160 адам  ташылады.   
 Кавказ.РФ биригиуню кючю бла  он жылны ичинде «Эльбрус», «Архыз» эм  «Ведучи» курортлада 15 километр чакълы бирде 10 канат жол тартылгъанды. Ол санда эм бийикге кётюрюлгени Элбрусда ишленнгенди.   Узунурагъы уа  Чечендеди, ол 4,4 километрге жетеди. 
Аны бла бирге бюгюнлюкде энтта да сегизиси ишлене турадыла, ала быйыл хайырланыргъа берилликдиле. Алай бла 2030 жылгъа дери  институт канат жолланы юч кереге кёбейтирге мурат этеди.  Ол санда   Дагъыстанда «Кезеной-Амда» эм Ингушетияда «Армхи» курортда да жангы жолла  тартыллыкъдыла.   
Эсге сала айтсакъ, былтыр  Элбрусда  1 миллиондан артыкъ турист солугъанды. Ол санда Жангы жылны аллында 80 минг,   Черек, Чегем эм  Зольск  районлада уа 450 минг къонакъ болгъандыла.  Нальчик курортха  149 мингден аслам адам келгенди, аладан 50 минг чакълысы санаториялада кеслерине  бакъдыргъандыла.   Саулай алып айтханда, сагъынылгъан кезиуде  Къабарты-Малкъарны 1 миллион бла 786 минг адам жокълагъанды. Ол, буруннгу жыл бла тенглешдиргенде, 16 процентге кёпдю.  
Арт жыллада туристлени санына иги кесек къошула баргъаны себепли, алагъа тийишли инфраструктура къуралырча мадар этиледи, анга кёре къонакъ юйле, кафеле, сатыу-алыу  жерле, лыжа ызла, машиналагъа майданла    эм башха затла да ишленедиле.  
 Курданланы Сулейман хазырлагъанды.