Малкъар Россейге къошулгъанлы быйыл 198 жыл болады. Аны бла байламлы республиканы мектеплеринде тюрлю-тюрлю жумушла бардырыладыла. Бу кюнледе Нальчикни онунчу номерли школунда тамата классланы окъуучулары, устазлары жазыучула Османланы Хыйса эм Руслан Атабаев бла тюбешгендиле.
Анга школну директору Байрамкъулланы Фатимат Касаевна да къатышханды. Тюбешиуню аллында жазыучуланы юслеринден къысха айтып, жаш адамланы ала бла танышдыргъанды.
Андан сора Осман улу Малкъар Россейге къачан, къалай къошулгъаныны юсюнден айтханды. Эсигизге салайыкъ, 1827 жылда 5 январьда Басхан ауузундан тау бий Орусбийланы Мырзакъул жарым патчахха барып, Малкъар Россейге кеси ыразылыгъы бла къошулургъа излегенин билдиргенди.
Андан сора къайтып келип, тау бийле бла оноулашханды. Ызы бла дюгерли бийлеге да жолукъгъанды. Онбиринчи январьда уа Малкъар жанындан Орусбийланы Мырзакъул, Баймырзаланы Келмамбет, Шакъманланы Магомет, Жанхотланы Арслан хажи дюгерлилени жанындан Касай Кубатиев, Даулет Абисалов, Бийнёгер Карабугаев, Соза Саватов, Татаркъан Туугъанов жарым патчахха барып, Малкъарны бла Дюгерни Россейге къашарларын тилегендиле.
Ол кюнден башлап Малкъар Россейге къошулгъанына саналады. Андан бери малкъар халкъы Россей къыралында жашау бардырады. Ол сайлау керти да тюз да болгъаныны юсюнден айтхандыла жазыучула. Андан сора Осман улу бла Руслан Атабаев орус тилде кеси назмуларын окъугъандыла. Ол кюн ары келгенле Малкъарны Россейге къошулгъаныны юсюнден жангы шартла билгендиле. Тюбешиуню малкъар тилден бла адабиятдан устаз Газаланы Фатима Солтановна къурагъанды.
Лейлун улу Х.
