Быйыл 11-15 июньда Элбрусда  «Россейни къаялары. Эльбрус-2024» деген ат бла  жайны эм уллу фестивалы башланырыкъды. Аны  Россейни Къаялагъа ёрлеуню бла Альпинизмни федерациялары бирлешип бардырлыкъдыла.  
Анга къыралны регионларындан сынамлы спортчула, альпинизм бла иги кесек заман кюрешгенле эм биринчи кере кеслерин сынаргъа сюйгенле да къатышаллыкъдыла, деп билдириледи телеграм-каналда.
Бусагъатда фестивальгъа къатышырыкъла эсепден  ётедиле. Спортчула Къабарты-Малкъар къырал университетни билим бериу-илму арасында турлукъдула. 
Эришиу Жан-Туугъан базаны тийресинде  бийикледе  ётерикди. Ол Къаялагъа ёрлеучюню кюнюне жораланырыкъды. 
Бу жол къонакъланы къаялагъа тёрели халда  ёрлеуден сора да, спорт жаны бла программа да сакълайды.  Анга 10-17 жыллары толгъан жаш адамла да  къатышаллыкъдыла. 
Эсге сала айтсакъ, быйыл бла фестиваль экинчи кере ётерикди. Былтыр анга къатышыргъа Россейни регионларындан,  Азербайджандан, Беларусь Республикадан эм башха жерледен да 500-ден аслам адам келгендиле. 
Быйыл къаячыланы жангы трассала сакълайдыла. Аланы былтыр кюз артындан бери жарашдырып кюрешедиле.