Гу лъумытапIэ иIэкъым иужьрей илъэсхэм Урысейм къыщыдаха проектыщIэхэмрэ программэ­щIэхэмрэ мыхьэнэшхуэ зэраIэм. Ди республикэр ­къапщтэмэ, гъуэгухэми, къалэ пщIантIэхэми, школ­хэми, сабий Iыгъы­пIэхэми, къинэмыщI цIы­ху­бэ зэ­хэзекIуапIэхэми фIыкIэ захъуэжащ. Теп­лъэмрэ къабзагъымрэ зыхуей хуэза нэужь, гумрэ псэмрэ я Iыхьэри къалъыхъуэ.

Мы махуэхэм телеграмым щызэбгрыкIащ Мейкъуапэ и къалэтет Митрофанов Геннадий къалэр зыхэт проектхэм япкъ иткIэ яхузэфIэкIар къыщи­пщытэжа тхыгъэр. Ар мейкъуапэдэсхэм я адыгэбзэр езыгъэфIакIуэ гуэру къы­зэ­рыщIэкIар тфIэгъэщIэгъуэн хъуащ. 
«Ди къэралым и хъу­гъуэфIыгъуэ нэхъыщхьэр абы щэнхабзэрэ бзэуэ, ­хабзэрэ псэукIэ хьэлу куэд зэры­щызэблэкIырщ, - ­щетх Митрофановым и телеграм-­каналым. - Мейкъуапэ адрей къалэхэм ­къахэзыгъэщ теплъэ хуэхъуну къэтлъытащ, ди республикэм щыпсэу лъэпкъ­хэм я тхыдэ напэкIуэцIхэр хъумэныр нэхъапэу дгъэ­увмэ. Ди лэжьыгъэм и зы Iыхьэщ «Бзэр цIыху лъэп­къым и псэщ» проектыр. АдыгэбзэкIи урысы­бзэ-  кIи псалъэжьхэр тет­хауэ, ­Мейкъуапэ пкъохэр дэдгъэуващ. Зэман дэкI­мэ, абыхэм макъкIэ къе­джэу тщIыну ди ­мурадщ. ЖыIэгъуэ шэрыуэрэ псалъэжьу зэхэтщ пкъо 12-м кIэрагъэубыдахэр, абыхэм къызэщIаубыдэ лъэпкъ зэмылIэужьыгъуэхэм я псэукIэ хабзэхэр. Зи гугъу тщIы Iуэхум текIуэда мылъ­кур къэралым, республикэм, щIыпIэ бюджетхэм ягъэува грантхэм я ­IэмалкIэ тхузэфIэкIащ». 
Хэт имылъагъунрэт Налшык и уэрамхэм адыгэбзэкIэ е балъкъэрыбзэ- кIэ псалъэжьхэр зытетха ­пкъохэр дэту, ахэр урысы­бзэкIэ зэдзэкIыжауэ. ­«Хъуапсэ и псэ кIуэдкъым», - жиIащ адыгэм, ауэ псалъэжьым и етIуанэ Iыхьэри зыщыдвмыгъэ­гъупщэ: «Фыгъуэр мыгъуэ ­мэхъу». 
ГушыIэр къэгъэнауэ, ди гуапэ мыхъуу къанэркъым Налшык зыгъэпсэхуакIуэ  е зыплъыхьакIуэ къа­кIуэ­хэм къалэр ягу зэрырихьыр. Иджыблагъэщ Дагъыстэным щыщ блогер Алискеров Мурат «Паркым хэт къалэ» зыфIэпщ хъуну и интервью гукъи­нэжыр Татрокъуэ Башир щритар, Налшык щхъуантIагъэм зэрыщIи­гъэнам­-рэ къалэр зэрыкъабзэмрэ къыщыхигъэщу. Ауэ теп­лъэ къудейм къыщы­мы­нэу, къалэм купщIэ куу иIэ­нымкIэ Мейкъуапэ удэп­лъей хъунущ. 
ЧЭРИМ Марианнэ.