КъМР-ни Транспорт эмда жол мюлк министерствосундан билдиргенлерича,  республикада «Къоркъуусуз эм тынгылы автомобиль жолла» миллет проектге кёре иги кесек иш этилгенди. Бюгюнлюкде аны чеклеринде регион эм  район магъаналы жоллагъа эм кёпюрлеге да   тынгылы ремонт  бардырылады.   

Саулай алып айтханда, алты жылны ичинде Къабарты-Малкъарда 1118 километр чакълы бир  жоллада тынгылы ремонт бардырылгъанды эм 380 километрде кече жарытырча мадар этилгенди. 

Эсге сала айтсакъ, былтыр "Къоркъуусуз эм тынгылы автомобиль жолла" миллет проект ишин бошагъанды. Быйылдан башлап аны орунуна "Жашау этерге инфраструктура"  миллет проект бардырыллыкъды. 

Районлада этилген ишле

Бахсан районну юсюнден айтханда, мында иги кесек жол мардалагъа келиширча болгъанды. Миллет проект ишлегенли,  алты жылны ичинде 74 километр жол жангы излемлеге келиширча болгъандыла.
Май районда: Майский, Заречный, Ново-Ивановское, Право-Урванский эм  Красная Поляна эллеге баргъан  жолланы 42 километрине тынгылы ремонт этилгенди.
Прохладна районда 70 километрден  артыкъ жолгъа къаралгъанды.Ол санда былтыр  Пролетарское элде Брянцева орам игилендирилгенди.
Лескен районда сагъынылгъан кезиуде тийишли ишле Аргудан, Урух, Анзорей, Экинчи Лескен эм  Ерокко элледе ётгендиле. Алай бла регион магъаналы жолланы  35 километри тапландырылгъанды. Урван районда да  Псыгансу, Кахун, Герменчик, Эски Черек эм Нарткъала элледе 30 километрден аслам он жолгъа къаралгъанды.
Элбрус районда  20 километр тенгли бирде жети жол мардалагъа келиширча болгъандыла. Черек районда да  Бабугентде, Огъары Малкъарда, ол санда Мухол микрорайонда  эм  Жемталада жолланы  32 километри игилендирилгенди.
Терк районда 30 километр чакълы бирде 9 жолгъа тынгылы ремонт этилегнди. Чегем районда уа  60  километрде  17 жол айбат эм къоркъуусуз болгъандыла.

Нальчикде да болум иги жанына тюрлене барады

Сагъынылгъан миллет проектге кёре, республиканы ара шахарында бла округунда, ол санда Хасания, Акъ-Суу эм Адиюх элледе   иги кесек жол жангыртылгъанды.

Алты жылны ичинде  Нальчикде 95 километр тенгли бирде 85 орамгъа тынгылы ремонт этилгенди.  Ишлени кезиуюнде жолланы мурдорларын кючлегендиле, кенгертгендиле, афалть жайгъандыла,  чыпынлы чыракъла,  тротуарла, улоу тохтарча жерле, "зебрала" светофорла, жорукъланы билдирген белгиле бла ызла да салгъандыла.  

Алай бла, эсеплей айтханда, транспорт инфраструктураны игилендирирча эм къоркъуусузлукъну жалчытырча уллу иш этилгенди. Бу жаны бла иш мындан арысында да барлыкъды. 

Бизни корр.