«Кавказым и щIыпIэ нэхъ удэзыхьэххэр» фIэщыгъэр зэрихьэу дунейпсо лъэпкъыбэ зэхьэзэхуэ интернетым иджыпсту щокIуэкI. Абы и къалэн нэхъыщхьэу щытыр Кавказ Ищхъэрэмрэ Ипщэмрэ я къалэ, курорт нэхъыфIхэу туристхэм къалъытэхэр IэIэт зэIухакIэ зэхэгъэкIынырщ.
«Кавказым япэу зыплъыхьакIуэ къэкIуэну зызыгъэхьэзырхэм я нэхъыбапIэм ящIэркъым къыхахыну е къыщыувыIэну щIыпIэхэр. Лъэпкъыбэ IэIэтыр хуэунэтIащ цIыхухэм я узыншагъэм щыкIэлъагъэплъ, бгыхэм лыжэкIэ къыщежэх хъуну е тенджыз Iуфэм зыщагъэпсэхуну, апхуэдэуи нэгузыужьыпIэхэу ди щIыналъэхэм яIэхэм я нэхъыфIхэр дэтхэнэрами зэхэгъэкIыным. Абы и фIыгъэкIэ Кавказым уздэкIуэ, здэбунэтI хъуну и щIыпIэхэр турист нэхъыбэм къацIыхунущ, нэхъапэм зэхамыха ди зыгъэпсэхупIэхэм, ди щIыуэпсым и дахагъэм щыгъуазэ хъунущ», - жиIащ зэхьэзэхуэм и унафэщI Абдулаев Магомед.
«Туристические символы Кавказа» интернет IэIэтыр екIуэкIынущ 2025 гъэм щIышылэм и 17-м къыщыщIэдзауэ гъатхэпэм и 1 пщIондэ (www.caucasus.world). Абы хэт хъунущ Кавказ Ищхъэрэмрэ Ипщэмрэ щыпсэухэм нэмыщI, Урысей Федерацэм и адрей щIыналъэхэми хамэ къэралхэми щыщхэр.
«Дызэрыгушхуэ ди щIыналъэхэм я къалэхэм, курортхэм, турист ебэгъапIэхэм цIыху нэхъыбэ зэхьэзэхуэм къызэрыришэлIэнум шэч хэлъкъым. Мыхьэнэшхуэ иIэщ ди цIыхухэм нэмыщI, абы нэгъуэщI щIыналъэхэм щыпсэухэри зэрыхэтынум. Си фIэщ мэхъу Кавказ Ищхъэрэм и щIыпIэ телъыджэхэм яхуэфащэ увыпIэхэр зэхьэзэхуэм зэрыщаубыдынум», - жиIащ УФ-м и Президентым и лIыкIуэу КИФЩI-м щыIэм и къуэдзэ Надыкто Владимир.
КъызэгъэпэщакIуэхэм зэхьэзэхуэм щIыпIэ 20 хагъэхьащ, абыхэм ящыщу 12-р Кавказ Ищхъэрэм, 8-р - Кавказ Ипщэм яйуэ. Къэбэрдей-Балъкъэрыр хэтщ «Кавказым и туризмэм и къалащхьэ», «Кавказым и турист кIуапIэ нэхъыщхьэ», «Кавказым и бгы-лыжэ курорт», «Кавказым узыншагъэр щызэтрагъэувэж и курорт нэхъыфI» зэпеуэхэм.
Зэхьэзэхуэм хэтыну щIыпIэхэр къыщыхахым къызэгъэпэщакIуэхэм зытрагъэщIар, къалъытар зы пIалъэм къриубыдэу абыхэм зыщызыгъэпсэху турист бжыгъэм я куэдагъырщ, абыхэм щыIэ щIыпIэ телъыджэхэрщ. Кавказым и щIыналъэхэм я инагъхэм ятещIыхьауэ зэхьэзэхуэм хэтыну щIыпIэхэри къыхахащ.
Кавказ щIыналъэм зыгъэпсэхуакIуэ къакIуэ хьэщIэхэр щIэупщIэ хъуащ КИФЩI-м и щIыналъэхэр, Куржыр, Азербайджаныр зэпызыщIэ турист лъагъуэхэм икIи апхуэдэхэр пхашын мурадхэр щыIэщ.
Иджы ирагъэкIуэкI зэхьэзэхуэм кърикIуахэр зэхалъхьэжа нэужь, Кавказ Ищхъэрэмрэ Ипщэмрэ я турист щIыпIэхэр зэпызыщIэ дунейпсо турист портал къызэрагъэпэщынущ.
ХЬЭЩЫКЪУЕЙ Олег.
