Быйыл «Жашау этерге инфраструктура» миллет проектге кёре эм  республикалы бюджетден бёлюннген   ахчагъа   тынгылы  ремонт этилирге тийишли  регион  магъаналы жолла белгиленнгендиле. Саулай алып айтханда, ишле онбеш элде бардырыллыкъдыла, аны кезиуюнде  55 километр чакълы бирде 26 объект жангыртыллыкъды. 

Тийишли ишле билим бериу, спорт, саулукъ сакълау, маданият дегенча  социал магъаналы учрежденияла орналгъан эм район арала бла байламлы болгъан жоллада тамамланырыкъдыла. 

Ол санда Прохладна районда эрттеден сакъланнган Новопавловск - Прохладный - Моздок жолну  6,4 километр чакълы бирине  къараллыкъды. Ол Прохладный шахарны  Магистральный  эм  Первомайский орамлары бла ётеди. 

 Зольск  районда Малка жолну  8,1 километр кесегине тынгылы ремонт этилликди. Ол Ленин , Хуранов атлы орамла  бла ётеди. Алада юч мектеп,  сабий сад, межгит,  фельдшер-акушер пункт, полицияны бёлюмю, элни администрациясы эм башха объектле да орналадыла.

 Май районда да  Александровская - Озрек эм Нальчик - Майский эм  Прохладный - Эльхотово жолла  мардалагъа келиширча боллукъдула. 
Эм кёп регионал жоллагъа  Терк  районда къараллыкъды, ала беш бардыла. Ол санда Майский - Урожайное эм  Прохладный - Эльхотово жоллада кёпюрле ишленирикдиле. Ала Терк сууну юсю бла ётедиле,  узунлукълары 180 эм 162 метрге жетеди. 

 Урван районда  Морзох – Шитхала,  Эски Черек – Жемтала - Сукан-Суу жолла жангыртыллыкъдыла. 

  Чегем районда уа былтырдан бери  Экинчи Чегем-Булунгу жолну 25 километринде тийишли ишле тамамланадыла. Аны чеклеринде тогъуз кёпюр ишленирикди.   Андан сора да, Каменкагъа баргъан жолну  да  1,8 километри мардалагъа келиширча боллукъду.
Элбрус районну юсюнден айтханда,  Нейтриногъа баргъан жолну 1,5 километри игилендирилликди. 
Алгъадан этилген келишимлени хайырындан сагъынылгъан объектледе  тийишли ишле   жууукъ заманда башланырыкъдыла.

Бизни корр.