Дызыхыхьа илъэсым ­республикэм и щIыналъэ ­гъуэгухэм хыхьэхэу гъуэгу лэжьыгъэхэр щрагъэ­кIуэ­кIыну щIыпIэхэр яубзы­хуащ. Ахэр 26-рэ мэхъу икIи псоми зэхэту километр 55-м щIигъу я кIыхьагъщ.

Лэжьыгъэхэр ирагъэ­кIуэкIынущ «ГъащIэм пап­-щIэ инфраструктурэ» лъэпкъ пэхуэщIэщIэмрэ ди щIыналъэмрэ я мылъкукIэ. Абы ­хиубыдэнущ республикэм и къуажэ 15. Къызэгъэпэ­щы­жы­ныгъэ лэжьыгъэхэр щрагъэкIуэкIыну автомобиль ­гъуэгухэм хуашэ социальнэ мыхьэнэ зиIэ IуэхущIапIэ-       хэм - сымаджэщхэм, еджа­пIэ­хэм, ЩэнхабзэмкIэ унэ­хэм, спорт ухуэныгъэхэм, нэ­гъуэщIхэми. Апхуэдэуи абы­хэм зэпащIэ районхэмрэ ­къуажэхэмрэ. 
Псалъэм къыдэкIуэу Прох­ладнэ щIыналъэм къыщы­зэ­рагъэпэщыжынущ цIыхухэр куэд щIауэ зыпэплъа, Новопавловск къуажэр, Прохладнэ, Мэздэгу къалэхэр зэпы­зыщIэ гъуэгур, Прохладнэ ­къалэм и гъунэпкъэм нэсыху. Гъуэгур ирокIуэ къалэм и ­Магистральнэ Первомайскэ уэрамхэм икIи абы кило­метри 6,4-рэ и кIыхьагъщ.
Дзэлыкъуэ щIыналъэм къыщызэрагъэпэщыжынущ Малкэ къуажэмрэ Ингушли урочище зэпызыщIэ гъуэгур. Лэжьыгъэхэр щрагъэкIуэ­кIынущ Лениным и цIэр зе­зыхьэ уэрамым, адэкIэ Хъураным и цIэр зезыхьэ уэрамым хыхьэжыр. Гъуэгум къыб­гъурытщ курыт еджапIэу 3, сабий сад, мэжджыт, фельдшер-акушер пункт, полицэм, къуажэ адмнистрацэм я хэщIапIэхэр. 
Май щIыналъэм автомо­биль гъуэгуитI зыхуей хуа­гъэзэнущ: Александровс­кэмрэ Уэзрэдж къуажэмрэ, Налшык - Май къалэхэр зэ­пызыщIэхэр. ЕтIуанэм деж лэжьыгъэр щрагъэжьэнущ Октябрьскэ къуажэм щы­щIэдзауэ Прохладнэрэ Елъхъуэтымрэ зэпызыщIэ автомобль гъуэгум нэсыху. 
Тэрч щIыналъэм и щIы­пIитху хиубыдэнущ мы гъэм къызэрагъэпэщыжну гъуэгу­хэм. Абы щыщу тIур Тэрч псым телъ лъэмыжитIырщ. Зыр, метри 162-рэ зи кIы­хьагъыр, Май къалэмрэ ­У­ро­жайнэ къуажэмрэ зэпы­зы­щIэ автомобиль гъуэгум хохьэ. ЕтIуанэр хуозэ Прох­ладнэмрэ Елъхъуэтрэ зэ­пы­зыщIэм, абы метри 180-рэ и кIыхьагъщ. 
Абы нэмыщI, къызэгъэпэ­щыжыныгъэ лэжьыгъэхэр щрагъэкIуэкI Дей къуажэм ЩауэцIыкIум и цIэкIэ щыIэ и уэрамым. Ар ирагъэжьащ 2024 гъэм. Апхуэдэуи мы гъэм пэрыхьэнущ Дей, Курп Ищхъэрэ къуажэхэр зэпы­зыщIэ, Осетие Ищхъэрэ - Аланием и гъунапкъэм нэ­сыху кIуэ, километри 5,8-рэ  зи кIыхьагъ автомобиль ­гъуэгум, абы къыбгъэдэкIыу Курп Ищхъэрэмрэ Ипщэмрэ зэпызыщIэ гъуэгур, кило­метри 4,5-рэ зи кIыхьагъыр хэту.
Аруан щIыналъэм къыщы­зэ­рагъэпэщыжынущ километр 14 зи кIыхьагъ щIыналъэ гъуэгур - Мэрзэхъурэ Шытхьэлэрэ, Шэрэдж Ищхъэрэ, Жэмтхьэлэ, Сукан-Су къуажэхэр зэпызыщIэхэр. 
Шэджэм щIыналъэм нэ­гъабэ щегъэжьауэ къызэгъэпэщыжыныгъэ лэжьыгъэхэр щрагъэкIуэкI Шэджэм ЕтIуанэмрэ Булунгурэ зэпы­зыщIэ, километр 25-рэ зи кIыхьагъ гъуэгур. Абы хеу­быдэ лъэмыжу 9. Апхуэдэуи къызыхуэтыншэу къагъэ­щIэ­рэ­щIэжынущ Каменкэ къуа­жэм къыпекIуэкI, километр 1,8-рэ зи кIыхьагъ автомо­биль гъуэгур.
2025 гъэм Iуащхьэмахуэ щIыналъэм щыIэ нейтринэ обсерваторием хуэкIуэ, ки­лометр 1,5-рэ зи кIыхьагъ ­гъуэгур зыхуей хуагъэзэнущ.
Лэжьыгъэхэр псори дызы­хыхьа илъэсым и япэ мазэ­-хэм ирагъэжьэнущ, языны­къуэхэми щрагъэкIуэкI. 
ХЬЭЩЫКЪУЕЙ  Олег.