Тыш къыраллагъа минг тоннагъа жууукъ продукция жиберилгенди![]() Былтыр Къабарты-Малкъардан тыш къыраллада алыучулагъа 935,5 тонна мал ашла, сора сют эмда эт продукция жиберилгенди, деп билдиргендиле Россельхознадзорну Шимал Кавказда регионла аралы Управлениясындан. Предприятияла ол санда 451,5 тонна сют продукцияны Къазахстаннга, Азербайджаннга эмда Гюржюге сатхандыла, мал ашланы уа (460 тонна) Гюржюге бла Азербайджаннга ашыргъандыла. Дагъыда экинчисинде алыучуларына 24 тонна къыйма жибергендиле. Продукцияны барына да Россельхознадзор тынгылы контроль этгенди. Аланы къагъытлары тап жарашдырылгъан эдиле, качестволарына да сёз айтырча болмагъанды, дегендиле Управленияда. Республиканы тарых бетлери – орузламада Къабарты-Малкъарны Архив службасы быйылгъа орузлама басмалагъанды. Анда уа республиканы жашауу бла байламлы 2025 жылгъа тюшген белгили кюнлени эмда болгъан ишлени, сора адамланы юслеринден окъургъа неда билирге боллукъду. Сёз ючюн, 1940 жылда январьны биринчисинде таулу композитор Байчеккуланы Мутайны жашы Абидин туугъанды. Ол КъМАССР-ни искусстволарыны сыйлы къуллукъчусуду, КъМАССР-ни къырал премиясыны лауреатыды, кеси да эки жюзден артыкъ чыгъарманы авторуду. Ол жылда экинчи январьда уа РФ-ни эмда КъМАССР-ни сыйлы артисти Юсюпланы Хамид туугъанды. Январьда онбешинчисинде Минги тауну тёппесине айырмалы уруннган колхозчула чыкъгъан эдиле. Ол кюн 1935 жылда къыш альпиниада ётгенди КъМАССР-де. 1960 жылда 27 январьда уа Нальчикде Н. К. Крупская атлы уллу китапхана ачылгъанды. Ол бары да орузламада басмаланады. Декларацияланы бериу кезиу башланнганды Федерал налог службаны (ФНС) Къабарты-Малкъарда бёлюмюнден билдиредиле: 2024 жылда тюшюрген файданы юсюнден декларацияны быйыл 30 апрельге дери берирге керекди. Сюйсегиз Управленияны кесине элтигиз, сюйсегиз а МФЦ-гъа жиберигиз, дейдиле анда. Декларация файданы ма былай тюшюргенледен изленирикди: - болжалындан (3 жылдан) аз заманны иеликде тутхан мюлкню, дагъыда багъалы къагъытланы, уставной капиталда юлюшню сатхандан; - фатарны, отоуну неда башха мюлкню ортакъгъа бергенден; - предпринимательство бла кюрешгенден; - саугъагъа алгъандан; - лотереяда неда башха жумушда хорлагъандан. Жеринден тепдирилмеген мюлкню сатханда 1 миллиондан, башха тюрлю мюлкден а 250 минг сомдан аз тюшген эсе, декларацияны берирге керекмейди. Башхала уа налогларын 2025 жылда 15 июльгъа дери тёлерге борчлудула. Налог агент НДФЛ-ни тыймай эмда ФНС-ге билдирмей къойса, декларацияны кесигизге берирге тюшерикди. Агент ол борчун тындыргъан эсе уа, налог орган адамгъа аны кеси жиберликди; анга кёре НДФЛ-ни 1 декабрьге дери тёлерге керек боллукъду. Улбашланы Мурат.
Поделиться: ЧИТАТЬ ТАКЖЕ:
|