Улоуну руль артында олтуруп, телефоннга къарап баргъан инсан авариягъа тюшюп, кесине, башхалагъа да уллу хата салыргъа боллукъду. Алай энди уа аллай адамланы жол камерала суратха тюшюрлюкдюле, ызы бла алагъа 1500 сом тазир салынырыкъды.

Сотовый телефонну алай хайырланыу не бла къоркъуулуду? Адам анга къарап барса, жолгъа эс буралмайды, аллына чыкъгъан затны, светофорда къызыл чыракъ жаннганын кёрмейди неда аланы кеч эслейди. Дагъыда бир къолу рульну тутхан инсаннга улоуну ары-бери бургъан да къыйынды.

Бу айтылгъан бошуна тюйюлдю: алимлени тергеулерине кёре, руль артында телефон бла сёлешип баргъан адамгъа жол транспорт болумгъа (ДТП) тюшерик къоркъуу тёрт кереге кёбейеди. Ол адам экраннга къарап, абери окъуп неда жазып бара эсе уа – 20 кереге окъуна!

Жорукълада жазылгъаныча, машина бир сагъатха 60 километр къызыулукъ бла бара тургъанда, жаланда бир секунд бир жанына къарасагъыз, 16 метрни жолну кёрмей ётесиз. Анда чурум чыкъса уа, андан къутулаллыкъ тюйюлсюз.

Россейде улоуну руль артына олтуруп, телефон бла кюрешип барыргъа жарамайды – тийишли жорукълада (ПДД) 2.7 бёлюмюнде ол жик жиги бла белгиленеди. Алай этген инсаннга 1500 сом тазир салынады.

Бу айны онючюнчюсюнден башлаб а, энди жол камерала да контроль этерикдиле анга. Айтханларына кёре ала хар быллай шартны женгил кёредиле, адам бел бауну къысханын, къолунда телефонну тутханын да суратха тюшюредиле.

Улбашланы Мурат хазырлагъанды.