«Спартак-Нальчик» профессионал футбол клубда «Спорт терроргъа къажауду» деген чакъырыу бла эришиуле къуралгъандыла. Анга республиканы районларындан футболдан школланы къауумлары къатышхандыла, аланы оюнларына къараргъа да аслам адам келгенди, деп билдиргендиле республиканы Жаш тёлюню ишлери жаны бла министерствосундан.

Оюнла башланырны аллында жыйылгъанланы власть органланы бла жамауат биригиулени келечилери алгъышлагъандыла. Ала ата-аналаны, тренерлени да жаш адамла экстремистлени алдаулу чакъырыуларына бой салмазча ёсдюрюуге, аланы саулукълу жашау бардырыргъа, шуёхлукъну багъаларгъа юйретиуге эс бурургъа чакъыргъандыла.

Матчлада уа биринчи жерни «Атал» (Нальчик) къауум алгъанды, «Энергетик» (Прохладный) – экинчи, «Спартак» (Нальчик) а ючюнчю болгъандыла.

Эришиу «Къабарты-Малкъар Республикада терроризмни бла экстремизмни профилактикасы» къырал программаны чегинде ётдюрюлгенди.

Кульчаланы Зульфия.