Пщэдей, дыгъэгъазэм и 9-р, Хэкум и ЛIыхъужьхэм я махуэщ. Урысейм судкIэ тезыр зытралъхьахэм ар егъэпшынынымкIэ и федеральнэ къулыкъум и IуэхущIапIэу КъБР-м щыIэм и ветеранхэмрэ лэжьакIуэхэмрэ абы хуэгъэпса Iуэху щхьэпэ къызэрагъэпэщащ - Налшык къалэ дэт гимназие №13-м и 10 - 11-нэ классхэм щеджэхэм лIыгъэм и дерс драгъэкIуэкIащ.
Сасыкъ Анзор, Быф Беслъэн, Созэрыкъуэ Анзор сымэ школакIуэхэм яхутепсэлъыхьащ ЛIыгъэм и орденыр зыхуагъэфэща я лэжьэгъухэм.
- Мы махуэм дэ дигу къыдогъэкIыж КъБР-м и уголовнэ-гъэзэщIакIуэ IэнатIэм и лэжьакIуэхэу террористхэм яIэщIэкIуэдахэр. Абыхэм къэмылэнджэжу икIи лIыгъэ яхэлъу управленэр яхъумащ IэщэкIэ зэщIэузэда бзаджащIэхэр къыщытеуам икIи къыхуагъэфэщащ дамыгъэ лъагэхэр, - ядэгуэшащ школакIуэхэм къэрал кIуэцI къулыкъум и полковникыу пенсэм щысым. УИС-м и ветераным къыхигъэщащ ФСИН-м и щIыналъэ Управленэм и сатырхэми ноби зэрахэтыр орден, медаль зэмылIэужьыгъуэхэр къэзылэжьахэр.
ШколакIуэхэм гъэщIэгъуэн ящыхъуат хьэщIэхэм я IэщIагъэр. Абыхэм упщIэхэр иратащ я къулыкъум епха еджапIэ нэхъыщхьэхэм узэрыщIэтIысхьэнум, я деж лэжьапIэ узэрыувынум теухуауэ. КадрхэмкIэ, гупым гъэсэныгъэ, социальнэ лэжьыгъэхэр ядегъэкIуэкIынымкIэ къудамэм и инспектор нэхъыжь Созэрыкъуэ Анзор яжриIащ юриспруденцием къыщыщIэдзауэ хъыбар технологиемкIэ IэщIагъэлIхэм я деж щыщIэкIыжу я зэфIэкI а IэнатIэм зэрыщагъэлъэгъуэфынур.
БАХЪСЭН Ланэ.
