Шэджэм щIыналъэ администрацэм и унафэщI Борсэ Юрэ иджыблагъэ IущIащ дзэ Iуэху хэхам хэт, 503-нэ полкым и командир Бэгъуэт Къантемыр. Ахэр тепсэ­лъыхьащ ди зауэлIхэмрэ абыхэм я унагъуэхэмрэ защIэгъэкъуэнымкIэ, зыхуей-зыхуэныкъуэхэмкIэ ахэр къызэгъэпэщынымкIэ щыIэ Iэмалхэм.

Абы иужькIэ Борсэм зригъэлъэгъуащ «ПсэупIэмрэ къалэ щыIэкIэмрэ» лъэпкъ пэхуэщIэм хыхьэу «Шэджэмыр ипэкIэ мэбакъуэ» щIыналъэ пэхуэщIэм ипкъ иткIэ Шэ­джэм псы Iуфэм деж щрагъэкIуэкI лэжьыгъэхэр зды­нэсар.
Мыбдежым, Къэбэрдей-Балъкъэрым и Iэтащхьэм и унафэкIэ, дзэ Iуэху хэхам хэтхэм я «ЩIыхьым и аллее» ­щаухуэ. Абы хиубыдэу а щIыпIэм щагъэувынущ Хэкум и хъумакIуэхэм - Совет Союзым и ЛIыхъужьхэу Байсултанов Алимрэ Къуэныкъуей Назиррэ, дзэ Iуэху хэхам хэтхэм, зауэ зэпэщIэувэныгъэхэм хэкIуэдахэм зыуэ щыт я фэеплъ.
Къалэдэсхэм я кIуапIэ хъуным хуэщIауэ яухуа мы щIыпIэм, «ТекIуэныгъэм и Парк» зыфIащынум, хуэфащэ увыпIэ фэеплъым щиубыдынущ. Ар зрагъэщIынур ­КъБР-м и цIыхубэ художник Катони Станиславщ.
Апхуэдэуи, гугъэ щыIэщ дзэ Iуэху хэхам хэт ди зауэлIхэм НАТО-м и Iэщэрэ техникэу щызэтракъутам, щызыIэрагъэхьам щыщ абдеж щагъэувыну. 
АЛБЕРДЫКЪУЭ  Iэмин.