Налшык дэт Лъэпкъ музейм, дзэ щIыхьым и пэшым, щекIуэкIащ «Нет уз святее товарищества» тхылъым теухуа зэIущIэ. Абы щызэхуэхьэсащ Украинэм щекIуэкI дзэ Iуэху хэхам хэтахэм, абы хэкIуэдахэм я унагъуэхэм я гукъэкIыжхэр.
Iуэхур къызэригъэпэщащ «Хэкум и къыщхьэщыжакIуэхэр» фондым и Къэбэрдей-Балъкъэр къудамэм. Фондым тхылъыр къыдигъэкIащ тхакIуэ Прилепин Захар и редакцэм щIэту. Мыр СВО-м теухуа рассказхэр зэрыт етIуанэ тхылъщ. Япэрейм, ««Жизнь за други своя» зи фIэщыгъэм, щытепсэлъыхьат Москва, ВДНХ-м, щекIуэкIа «Россия» гъэлъэгъуэныгъэшхуэм.
«Хэкум и къыщхьэщыжакIуэхэр» фондым къыдигъэкIа тхылъым ихуащ СВО-м теухуа рассказ 43-рэ. Ар щызэхагъэувэм, фондым къыхурагъэхьат дзэ Iуэху хэхам и ветеранхэм, СВО-м щыIэхэм я унагъуэхэм, абы хэкIуэдахэм я Iыхьлыхэм я хъыбару, гукъэкIыжу 750-м щIигъу.
- Ди фондым гулъытэ хуещI СВО-м хэтхэм, абы къратыкI хъыбархэр зэхуэхьэсыным, тхыдэм ахэр къыхэнэным, зи псэ зытахэм я фэеплъыр хъумэным. Дэ тхылъым идгъэхуа хъыбархэр къытIэрагъэхьащ дзэ Iуэху хэхам и ветеранхэм, абы мы зэманым щыIэхэм я благъэ-Iыхьлыхэм. Къулыкъум пэрыту зи псэр зыта ди лIыхъужьхэм я фэеплъыр дохъумэ, мы зэманым СВО-м и псэзэпылъхьэпIэм Iутхэм IуэхукIи псалъэ гуапэкIи дазэрыщIыгъур зыхедгъэщIэн папщIэ тлъэкI къэдгъанэ хъунукъым, - жиIащ фондым и щIыналъэ къудамэм и унафэщIым и къуэдзэ Къумыкъу Зульфия.
Дзэ Iуэху хэхам и лIыхъужь хъыбархэм къеджащ ПщыхьэщIэ Ахьмэд, Мэзло Заурбэч, Коваленкэ Роман сымэ. Ветеранхэр тепсэлъыхьащ СВО-м и хъыбархэм, къулыкъу къадэзыщIахэм я лIыхъужьыгъэм, дзэ Iуэхум щынэхъапэу къалъытэхэм.
ТхылъыщIэм иращIэкIа зэIущIэм кърагъэблэгъат дзэ Iуэху хэхам хэтахэр, къулыкъум пэрытхэм я унагъуэхэр, курыт еджапIэм щIэсхэр, студентхэр, щIалэгъуалэ зэгухьэныгъэхэм я лIыкIуэхэр, жылагъуэ лэжьакIуэхэр.
Зи гугъу тщIы тхылъыр Iэрагъэхьащ Мэлбахъуэ Тимборэ и цIэр зезыхьэ Лъэпкъ библиотекэм, КъБР-м и Лъэпкъ музейм, республикэм и еджапIэ нэхъыщхьэхэм.
ГУГЪУЭТ Заремэ.
