Нальчикде  сабий чыгъармачылыкъны «Эрудит»  арасында  Ананы кюнюне жораланып «Жукъла, балам, татлы жукъла» деген ат бла  эришиу болгъанды. Аны  Нальчик шахарны Тиширыуларыны совети  къурагъанды.  Ол  бу жол бла экинчи кере бардырылады эмда анга кёпден-кёп адам къошула барады. Бу жол анга республиканы шахарларындан,  эллеринден да жюзге жууукъ   сабий къатышханды. Аланы жыл санлары алтыдан башлап онжетиге дери эдиле. 

Тюбешиуню ача, тиширыуланы биригиуюню таматасы Лидия Дигешева  бешик жырла къаллай уллу магъана тутханларын айтханды. «Анала  бешик жырларында балачыкъларына жоралагъан тилеклерин айтхандыла. Алай бла  ана, ынна да сабийни тили бла да шагъырей этгендиле. Жарсыугъа, бюгюнлюкде бешик да, жыр да унутула барадыла. Аны эсге алып  къурагъанбыз бу конкурсну. Анга къатышхан хар сабий да  баланы бешикге салыр, анга жырын да айтыр»,- дегенди ол.

Бу аламат конкурсну башланыуу бла  анга къатышханланы  КъМР-ни Парламентини депутаты Наталья  Беспалова да алгъышлагъанды. «Бу бек магъаналы ишди. Нек дегенде конкурсха къатышханла анга хазырланнган заманда керекли китапла, газет статьяла да окъуп чыкъгъанларына, бешик жырны юсюнден  ынналарындан соруп билгенлерине да ишексизме. Алай бла сиз бешик жырны юсю бла ана тилни билирге итиннгенсиз. Бу конкурсда сиз барыгъыз да хорларыгъызгъа ийнанама.  Хайт дегиз!»-деп бошагъанды ол сёзюн.

Конкурсха къатышханла  юч къауумгъа бёлюннгендиле. Биринчисине – сабий саддан  къызчыкъла, экинчисине – башланнган классланы окъуучулары, ючюнчюсюне да  абадан класслагъа жюрюген жашла бла къызла киргендиле. Ала бирем-бирем эмда къауум-къауум да болуп, сахнагъа чыгъып,  «сабийни» бешикге бёлеуню, анга жыр айтыуну юсю бла сахна оюнчукъла да  кёргюзтгендиле. Къызчыкъланы бла жашчыкъланы миллет кийимле, энчи костюмла кийип сахнагъа чыкъгъанлары уа бютюнда къууандыргъанды. Ол а ала  тынгылы хазырланнганларын кёргюзтген шартды. Аланы хар бирине да къарагъан, тынгылагъан  хычыуун эди. Жырла уа орус, малкъар, къабарты тилледе айтылгъандыла. Аны бла бирге сабийле баланы бешикге салыуну, анга жыр айтыуну магъанасыны юсюнден да кеслерини оюмларын билдиргендиле.

Конкурс тёрт сагъатха жууукъ заманны баргъанды. Болсада ол гитчелеге, алагъа къараргъа келген абаданлагъа да  эригиулю тюйюл эди. Сабийле аламат макъамлары бла ариу жырларын, кёп жаны бла усталыкъларын кёргюзтгендиле. Ала барысы да кубокла, грамотала эмда майдалла бла саугъаланнгандыла, ючеулен а  энчи саугъала бла  белгиленнгендиле.

Былайда дагъыда чертип айтыргъа тийишли кёреме, конкурсха къатышхан  къызла бла жашла эртте заманладан келген бешик жырланы ана тиллеринде  шатык айтхандыла. Анга жюрини къаууму  да эс бургъанды.

Холаланы Марзият.