«Мени аппам бек огъурлу адамладан бириди, - деп жазады бизге Чегем шахарда жашагъан Табакъсойланы Фарида. - Ол  хапарлары бла бизни сейирсиндиргенлей турады. Аны себепли мен  анга терк-терк  барыргъа сюеме.

Бир жол аппам  кесини татлы тенги, белгили къаячы Ёлмезланы Абдул-Халимни бла аны къарындашларыны юслеринден хапар айтханды. Аланы сабий жыллары бирге ётгендиле. Ала бир тийреде ёсюп, бирге ойнай, уллу жашла болгъандыла. Аны юсюнден биринчи кере эшитгенимде, кесим да гитчечик эдим, аны себепли  сёз кимни юсюнден баргъанын  иги  ангыламагъан эдим. Алай артда ол бизни халкъыбызны ёхтемлиги, аны атын айтдыргъан альпинист Абдул-Халим болгъанын билгенме.

Аппам бла ол бюгюн да шуёхладыла. Ол къайры  барса да, андан  суратла жибермей къоймайды, ол санда Минги тауну тёппесинден да.   

Ёлмезланы Абдул-Халим кёп жылланы Къабарты-Малкъарны Альпинизмден, таугъа ёрлеуден эм спорт туризмден федерациясына башчылыкъ этип келеди. Андан сора да, республикабызны Жамауат палатасыны келечисиди. Жамауат ишден тышында уа, туугъан жерин, аны тарыхын сюйген эм багъалай билген адамды. 

Биринчи кере таугъа ол 28 жылында чыкъгъанды. Ол болгъан къауум алгъа кетип къалып, Абдул-Халимге аны жетерге тюшген эди ол заманда. Жетгенден сора да, ол аладан  3 сагъат алгъа  жетгенди Минги тауну тёппесине. Ма ол кюн Элбрус аны жюрегин кесине байлап, таучулукъгъа сюймеклик туудургъанды. Ёлмез улу дунияда бек бийик тау Эверестге да бизни жерлешлерибизден биринчи болуп миннгени бла ёхтемленебиз.

Кёпле биле да болмазла Абдул-Халим жашаууну иги кесегин къутхарыучулукъ ишге жоралагъанын. Россейни МЧС-ини Элбрус излеу-къутхарыу отрядына аны ол кезиудеги башчысы Тилланы Борис чакъыргъан эди. Ол туристлени къутхарыргъа ненча кере чыкъгъаныны саны да жокъду.

Дагъыда Ёлмез улу къыш марафон бла да кюрешгенди. Минги тауну кюнбатыш тёппесине (5642м.) чабып чыгъыуда тохташдыргъан (4 сагъат 59 минут) рекордун 10 жылдан артыкъ заманны киши озалмагъанды.  

Эллилерини арасында да аны сыйы-намысы да бийикдиле. Ол Эверестге чыгъып къайтхандан сора, аны юйюню къабыргъасына «Мында Эверестге кётюрюлген биринчи таулу жашайды» деген жазыулары бла къанганы такъгъан эдиле.

Дунияны бек бийик тау тёппесине ол 2009 эм 2011 жыллада чыкъгъанды. Анга дери баргъан россейли альпинистле ары Тибетни жанындан, тынчыракъ жол бла, чыгъып тургъандыла. Таулу жаш а  Непалдан кётюрюлгенди. Артда ол: «Экинчи кере мен ол жолну сайларыкъ тюйюл эдим. Бек къоркъуулу эди» - деген эди.

Эрттеден этген муратына жетгенин  Ёлмез улу Непалны ара шахары Катмандуда къонакъ юйдеги отоууна келип, ундуругъуна таяннгандан сора ийнаннганды. 2011 жылда уа ол бу таугъа экинчи кере да ёрлегенди. Бу жолгъу башламчылыгъын а ол кёчгюнчюлюкню къыйынлыгъын сынагъан миллетлеге жоралагъанды. Тау тёппеге ол малкъар халкъны байрагъы бла бирге башханыкъыланы да элтип, анда жайгъан эди.   

Бир жылдан а ол Африкадагъы Килиманджарогъа (5895м.) чыгъады. Эки жылдан а анга Къыш Олимпиада оюнланы отун Минги тауну тёппесинде жандырыргъа буюрулгъан эди.

2017 жылда уа ол закий Къайсыныбызны 100-жыллыгъына жоралап, Непалда аны назмуларын окъуу ингир бардыргъанды эм бийиклиги 6 минг метр болгъан Мера тау тёппеге аны суратын чыгъаргъанды.

Халкъла аралы класслы къутхарыучубуз Къазахстанда туугъанлыкъгъа, 1969 жылдан бери Ата журтундады. Малкъар тауларындан кёпге кетмей, жашауун алай ётдюреди. Мен да мындан ары Абдул-Халим Мукаевичге саулукъ тежейме эм биз аны бла барыбыз да ёхтемленнгенибизни энтта да бир кере белгилерге сюеме».

Басмагъа Таппасханланы Аминат хазырлагъанды.