«Билим бериу» миллет проектни чеклеринде Къабарты-Малкъарда он школну къурулушу барады. Аланы барында да 5980 жер боллукъду.
«Бу мектепле хайырланыугъа берилгенлеринден сора, окъутууну бир сменнге кёчюрюрге онг боллукъду. Школла билим бериуню бюгюннгю излемлерине тийишлиликде жангы мебель эмда оборудование бла жалчытылынырыкъдыла. Хар биринде да шёндюгю коммунал инженер-техника системалары, сора жол-транспорт инфраструктуралары барды. Ала сабийлени болгъаныча алай къыйматлы, тынгылы, хар жаны бла да айнытхан онглары болгъан комплекследиле», - дегенди КъМР-ни Башчысы Казбек Коков.

Алай бла, Вольный Ауулда 12-чи номерли, 800 жерли мектепде эркин стадион, баскетбол бла волейбол ойнаргъа жараулу майданчыкъла, сквер да бардыла.
Онтёртюнчю номерли лицейге бла 23-чю номерли школгъа уа энтта да бирер корпус къошуллукъду. Биринчисинде ол - 800, экинчисинде уа 700 жерли боллукъдула.

Нарткъаланы къыбыла-кюнбатыш жанында орналгъан беш бёлюмлю, юч къатлы жангы мектеп тёрт гектардан аслам жерни аллыкъды, анда 400 сабийге билим берилликди. Бу школну тийресинде футболгъа эмда талай тюрлю башха оюнлагъа жараулу майданла да боллукъдула. 
Энтта да бир орта школну къурулушу Чегемде «Къыбыла» микрорайонда барады. Ол хайырланыугъа берилсе, анда 820 сабийге жерле боллукъдула, деп билдиргендиле Къабарты-Малкъарны Башчысыны эмда Правительствосуну пресс-службасындан.