Нальчикде къурулушлары бара тургъан эки уллу социал мекямны - биринчи номерли шахар поликлиниканы бла Чыгъармачы жаш тёлюню къаласыны - тийрелерин тапландырыу жаны бла иш къыстау барады.
- Ала экиси да республикабызны ара шахарыны ортасында орналыпдыла. Аны себепли аланы тийрелери ырахатлы болурча, шахарны бу кесегини архитектурасына келиширча этиу бек магъаналыды, - дегенди КъМР-ни Башчысы Казбек Коков.
Бюгюнлюкде мекямланы тийрелеринде жаяу эмда уллу жолла сыйдам эмда айбат болурча мадарла этиледиле. Битеу да 17 минг квадрат метрден артыкъ жерни тапландырыргъа тюшерикди. Ол санда жашил айрыкамчыкъла, сабийле, абаданла да солурча жерле, жаяу жолчукъла къураллыкъдыла, чыракълы чыпынла салынырыкъдыла.
Автомобильле салынырча майданчыкъла къурауну къайгъысы да кёрюлгенди - эки объектде да битеу да аллай 400-ден артыкъ майдан къураллыкъды, деп билдиргендиле КъМР-ни Башчысыны бла Правительствосуну пресс-службасындан.
