Къабарты-Малкъар къырал аграр университетде, КъМР-ни биринчи Президенти Валерий Коковну туугъан кюнюне атап, «Илму, билим бериу эмда бизнес: жангы къарам неда бирлешиу байламлыкъланы стратегиясы» деген халкъла аралы тёртюнчю илму-сынам конференция ётгенди. Аны ишине Россейден эмда тыш къыралладан билим бериу эмда илму учрежденияланы жюзден артыкъ келечиси къатышханды, деп билдиргендиле вуздан.

Жыйылгъанлагъа салам берип, университетни ректору Аслан Апажев, бизни республиканы эл мюлк министрини орунбасары Тимур Вадахов, экономиканы айнытыу министрини орунбасары Ольга Белецкая, Азербайджанны технологиялы университетини «Экономика» кафедрасыны башчысы Нушаб Гаджиев сёлешгендиле.

Аслан Апажев докладында Валерий Коковну жашау жолуну юсюнден хапарлагъанды. Ызы бла КъМКъАУ-ну талай келечиси да сёз алгъандыла. Бардыргъан ишлери бла жыйылгъанланы «Экономика» кафедраны башчысыны экинчиси Сафарби Пшихачев, «Управление» кафедраны профессору Рахайланы Хадис, университетни стратегиялы оюмла этиу, проект эмда инновацияла жумушла бла кюрешген бёлюмюню башчысы Тогъузаланы Тахир, сора дагъыда «Абхазияны социал-экономика тинтиуле арасы» организацияны келечиси Хатуна Шатипа шагъырейлендиргендиле.   

Темаланы сюзюуге КъМР-ни Цифралы айнытыу, связь эмда асламлы коммуникацияла министерствосуну инфраструктураны эмда связьны айнытыу бёлюмюню башчысы Зара Кочесокова бла РФ-ни Ара банкыны Къабарты-Малкъарда бёлюмюню келечиси Чеченланы Вячеслав къатышхандыла.

Конференциягъа къатышханлагъа ол алчы сынам, билим, жангычылыкъла бла шагъырейленирге аламат онг бергенди. Къонакъла анда хар неда тынгылы этилгенин белгилегендиле, аны къурагъанлагъа ыразылыкъларын билдиргендиле. Пленар кенгешден сора иш жети тематикалы секцияда бардырылгъанды. Алада туура этилген материалла уа университетни сайтында эмда eLIBRARY.ru электрон китапханада чыгъарыкъдыла.

Улбашланы Мурат.