Майнинг бла кюреширге жарайды

Быйыл 1 ноябрьден башлап Россейде инсанлагъа, предприятиялагъа бла организациялагъа эмда энчи предпринимательлеге цифралы валюта чыгъарыу бла кюреширге эркинлик берилгенди. Ала бары да РФ-ни Цифралы министерствосунда тийишли тизмеде болургъа керекдиле, деп айтылады объясняем.рф порталда басмаланнган ангылатыу материалда.

Электрокючню чыгъарыу, жибериу, сатыу-алыу бла кюрешген компаниялагъа уа аллай иш бла кюреширге чек салынады.

Налогланы эмда тазирлени къошакъ тёлеусюз

Бу айны биринчисинден башлап къыралгъа ахчаны терк жиберген система (СБП) бла кёчюргенде, комиссия тёлеу тыйыллыкъ тюйюлдю. Ол а, сёз ючюн, налогланы, тазирлени, сабий кружокланы неда секцияланы багъаларын тёлегенде бола эди.

Льготниклеге онгла

Саулукъларында чекленнген онглары болгъанлагъа, Чернобыльде аварияны кетериуге къатышханлагъа эмда льготалагъа тийишли башха къауумлагъа, жашау журт-коммунал жумушла ючюн къоранчларыны бир кесегин къырал жабаргъа керекди. Шёндюге дери иш былай болгъанды: адамны, сёз ючюн, фатарны жумушларына тёлеую жаны бла борчу болса, аны берип къутулгъандан сора окъуна аллай льготаны бермезге боллукъ эдиле. Энди уа ахыр юч жылгъа борчланы тергерикдиле, аны юсюнден информацияны ЖКХ къырал системадан аллыкъдыла.

Сыйлы донорлагъа тёлеуле женгил берилликдиле

Бу айны отузунчусундан сора «Россейни сыйлы донору» белгиси болгъанлагъа, хар жыллыкъ тёлеуню аладан абери сормай жарашдырып, алай берип башларыкъдыла. Аны ючюн жаланда «Госуслуги» порталда банкда счётну (ахча къайры келлик) билдирирге керек боллукъду.

Блогерле Роскомнадзорда эсепде

Биринчи ноябрьден башлап он мингден артыкъ къараучусу болгъан блогер кесини юсюнден толу информацияны Роскомнадзоргъа билдирирге борчлуду. Ол жюрютген аккаунт энчи реестрге тюшерикди, кесинде да тийишли белгиси боллукъду. Адамны юсюнден информация анда жашырын халда сакъланырыкъды. Бу законну чыгъаргъанла ол хыйлачыла бла къажау кюреширге болушуругъуна эмда керексиз информацияны жаяргъа чек салырыгъына ышаннганларын билдиредиле.

Мигрантлагъа Россейге жол жангы жорукъла бла

Жетинчи ноябрьден сора тыш къыраллы инсанны ким болгъанын билир ючюн, къырал геном регистрация этилгенде жарашдырылгъан информацияны хайырланырыкъдыла. Аллай адамланы атларын бла тукъум атларын къырал системалагъа орус тилге кёчюрюп алай тюшюрлюкдюле. Аны хайырындан документлени хазырлагъанда халатладан къутулургъа эмда алгъын бизде законлагъа къажау тургъанлагъа бери жолну жабаргъа боллукъду.

Улбашланы Мурат хазырлагъанды.