Минги тауну этегинде «Элбрусну къоруулагъанланы эсгертмесини» къатында Уллу Ата журт урушха жораланнган къараучу жер (музей) къуралгъанды. Бюгюнлюкде ол эм бийикде 3500 метрде орналгъан тарых-туризм объектге саналады. Стелада Минги тау ючюн немис фашистле бла къазауат этген Жигитлени атлары да жазылгъанды. 

 Майданда атлауучланы жангыртхандыла, билдирген къангала салгъандыла. Аны хайыры бла туристле Кавказ ючюн сермешни, Басхан ауузунда баргъан излеу ишлени, 1929 жылда 4050 метр бийиклиде альпинистлеге ишленнген къонакъ юйню - «Онбиреуленни ышыгъыны» юсюнден толуракъ билаллыкъдыла.   

- Майдан Уллу Хорламны 80-жыллыгъына аталгъан кенг проектни бир кесегиди. Алгъа 1942 жылда бу тийреледе баргъан сермешлени юсюнден билдирирча туристлеге эки жолчкуъ ишлер оюм этгенбиз. Болсада артда объектни къураргъа келишгенбиз. Энди солуучула суратха тюшерге, бу жерлени тарыхындан да билимлерин ёсдюрюрге онг табарыкъдыла. Проектни магъанасы жерлешлерибизге, къонакълагъа да ол къыйын заманладан кёбюрек хапар билдириргеди, - дегенди     Кавказ.РФ биригиуню маркетинг жаны бла таматасы Валерий Желателёв.

Проектни бардырырча жыл жарым кюреширге тюшгенди. Анга Кавказ.РФ биригиуню специалистлери, «Элбрусну къоруулагъанланы» музейни келечилери эм Москвадан тарыхчыла да къатышхандыла.

Жууукъ заманда проектни чеклеринде «Мир» станциядан Терс-Къолда обсерваториягъа дери эки жаяу жолчукъ да ишленирикдиле. Ала навигация, арт-объектле, билдириу къангала эм солурча жерле бла да жалчытылынырыкъдыла. Келир жылдан кеч къалмай аланы бошаргъа мурат этиледи. Саулай алып айтханда, келир заманда энтта да юч къараучу майдан ишленирикди.  

Бизни корр.