Роскадастрны Къабарты-Малкъарда бёлюмюнде аны юсюнден тынгылы айтхандыла эмда соруулагъа жууапла бергендиле.

Социал газификация программа 2021 жылда РФ-ни Президенти Владимир Путинни оноуу бла бардырылып тебирегенди. Ал заманда аны магъанасы бир эди – элледе жашагъанланы кёк отлукъ бла жалчытыу. Алай артда уа программаны кенгертгендиле. Энди аны хайырын эллени чеклеринде къуралгъан бахчачылыкъ биригиуледе жашагъанла да кёредиле.

Программаны шёндюгю магъанасы недеди?

Элге газ келип эсе, анда бахчачыланы биригиулерине аны хакъсыз жетдирликдиле.

Ала уа къалай билсинле элге киргенлерин?

Жеринден тепдирилмеген мюлкню бир къырал тизмесинден (ЕГРН) выписка алып. Анда жер участка къайсы категориягъа саналгъаны, кеси да элни тийресине киргени бла кирмегени кёргюзтюледи. Сёз ючюн, категориясы «Эл мюлк ишлеге тийишли» деп жазыла эсе, ол элни жерине саналмайды.

Бахчачыны участкасы элге жууукъ тура эсе уа бармыды амал?

Программада сёз жаланда эллени тийрелерине кирген участкаланы юсюнден барады. Сагъынылгъан биригиуледе жашагъанла уа, оноулашып, къатларында элге къошарча этерге боллукъдула кеслерин. Газ тартыргъа сюйселе, аны да ишин бир оюмгъа келип этерге керекдиле.

Быллай биригиуню не башхалыгъы барды?

Анда юй жылны бир кезиуюнде жашаргъа жараулуду, элдеги уа – сау жылны. Биригиуде юйде, ол тынгылы болгъанлыкъгъа окъуна, прописка этерге жарамайды. ЕГРН-ден выпискада анга «жашау этерге жарамагъан мекям» деп алай айтылады. Аны ючюн ары газ тартырыкъ тюйюлдюле.

Алай эсе уа, этер амал бармыды?

Бахчачылыкъ биригиуде орналгъан мекям, жашау журтха болгъан излемлеге келише эсе, аны ол категориягъа кёчюрюрге боллукъду. Алай этерча, къагъытларын хазырлап, аланы жер-жерли самоуправление органнга берирге керекди. Къагъытла уа ма быладыла: заявление, ЕГРН-ден выписка, объектни халин кёргюзтген заключение. Жашау журтну талай иеси бар эсе, аладан да эркинлик алыргъа керекди. Самоуправление орган 45 кюнню ичинде оноу этеди.

Аны дурус кёрмеселе уа?

Документлени бары да берилмеселе, боллугъу алайды. Дагъыда ол объект орналгъан жерде абери сюерге жарамагъаны неда ол тийрени суу басаргъа боллугъу ачыкъланса да.

ЕГРНД-де ол объектни юсюнден абери да жокъ эсе, аны ары эсепге салыргъа тюшерикди. Бу угъай, башха жумушлада да изленирикди ол. Сёз ючюн, кадастр номери болмагъан юйню неда объектни сатаргъа, алышыргъа, саугъагъа берирге жарамайды. Аланы барын да жаланда иеси этерге эркинди. Реестрге тюшмеген объектни уа осу ким болгъаны белгисизди.

Объектни халин кёргюзтген заключение

Аны инженер тинтиуле бла кюрешген специалист жарашдырады. Ол юйню халин тинтеди, излемлеге келишгенин кёргюзтеди, хайырланыргъа жарагъанын да туура этеди. Ол себепден, заключенияда юйню адам сау жылны ичинде жашаргъа жараулу болгъанын кёргюзтюрге керекди.

Хар неда бар эсе, газны тартдырырча къайры сёлеширге керекди?

Юйде жашаргъа жарайды, анга иелик барды, участок Росреестрде эсепдеди, бахчачылыкъ биригиуде жыйылыу бардырылып оноу этилгенди, ызы бла уа не?

Газны тартырча заявка берирге керекди. Аны биригиуню башчысы неда юйню иеси тамамларгъа боллукъдула. Ишин этерча МФЦ-гъа барыргъа неда Госуслуги порталгъа кирирге тийишлиди.

Заявленияны бергенде паспорт, СНИЛС, жерни эмда юйню къагъытлары керек боллукъдула. Дагъыда участка элни тийресинде къалайда орналгъанын кёргюзтген планны излерикдиле, бир сагъатха эм кёбю неллай бир газ къоратыллыгъын да сорлукъдула.

Улбашланы Мурат хазырлагъанды.