Пасэрей Мысырым и щэнхабзэ фэеплъу дуней псом къыщацIыху, ауэ нэгъуэщI щIыпIэ щымыпсэу цIывым и мывэ сурэтыр къыщIахыжащ Зеикъуэ и зы кхъэлэгъунэхэм.

Къэбэрдей-Балъкъэрым щыIэ Зеикъуэ къуажэм илъэс зыбжанэ хъуауэ археологхэр щолажьэ. Ахэр иджыпсту зэлэжьыр «Зеикъуэ 3» зыфIаща кхъэлъахэм къыщ1ахахэрщ. ЖыпIэ хъунущ иджыблагъэ къагъуэта зы  хьэпшыпым щIэныгъэлIхэр Iэнкун ищIауэ.

Фигу къэдгъэкIыжынщи, 2024 гъэм мыбдеж къыщагъуэтыжат ди лъэхъэнэм и 200 - 300 гъэхэм щыпсэуахэм къащIэна фэеплъхэр, гъуаплъэм къыхэщIыкIа хьэкъущыкъухэр, гъуджэхэр, кхъуэщынхэр, сабий хьэпшыпхэр, зэрызагъэпскI гуэрхэр.

НобэкIэ а кхъэлъахэм къыщагъуэтыжащ 300 гъэхэм псэуа бзылъхугъэм и кхъэлэгъунэр. Къэрал тхыдэ музейм и лэжьакIуэхэм зэрыжаIэмкIэ, ар щыщIалъхьэжа щIыпIэм зэрыщыпсэуам шэч хэлъкъым, ауэ пасэрей Мысырым и дамыгъэу скоробей жыхуаIэ цIыв лIэужьыгъуэм и мывэ фэеплъу бзылъхугъэм и кхъэлэгъунэм къыщIахар Кавказым къызэрыщыхутар къагурыIуэркъым.

Бзылъхугъэм и бгъэгущхьэм телъащ цIывыр зыфIэщIа пщэхъур. Ар къызэбгъэзэкIмэ, лъэпкъ дамыгъэ ибзыкIауэ тетщ. ЗэрыхуагъэфащэмкIи, абыкIэ зигъэдахэу аратэкъым цIыхубзым, атIэ и Iэр щIридзу зрихьэу арат.

Скоробейр Хьэпэрий мысыр тхьэм и дамыгъэщ, цIыхур къэзыгъэщIыжар арауэ я фIэщ хъууэ щытащ икIи цIыху Iэпкълъэпкъым цIывыщхьэ пыту къагъэлъагъуэрт. Абы къыхэкIыу, мывэм къыхэбзыкIа цIывыр цIыхум дыщIалъхьэу щытащ, лIар зэгуэр къызэрытэджыжынур я фIэщ хъууэ.

ЩIэныгъэлIхэм я щхьэр щIакъутэр зы Iуэхугъуэщ – хэтыт а бзылъхугъэр, мысыр цIывыр дыщIалъхьэну?

Фырэ Анфисэ.