Къабарты-Малкъар къырал университетде, физика эм математика институт къурап, регионла аралы илму семинар ётгенди. Сёз анда медицина физикада жангы технологияланы юсюнден баргъанды, деп билдиргендиле вузну пресс-арасындан.

Бу теманы сюзюуге сагъынылгъан институтну белгили алимлери эмда келечилери, сора дагъыда КъМР-ни саулукъ сакълау министрини орунбасары Марат Кармов, «Севкаврентген-Д» компанияны специалистлери да къатышхандыла.

Семинарда физика-математика илмуланы доктору, профессор, РАН-ны П.Н. Лебедев атлы физика институтунда рентген диагностика бёлюмню башчысы Александр Турьянский доклад этгенди. Ол кеси къурагъан диагностика комплексни юсюнден хапарлагъанды. Айтханына кёре, бу затны хайырындан рентген диагностиканы бютюнда тынгылы бардырыргъа боллукъду.

«Эм биринчиден тинтиу этгенде, ол азыракъ доза береди. Аны себепли онкология ауруу къозгъалыр деген къоркъуу да азаяды. Бу амал ёпке, жюрек, эндокринология аурууланы тинтгенде хайырлы боллукъду. Кардиохирургияда уа бютюнда къыйматлы болурун сакълайбыз», - дегенди профессор.

Алим айтханыча, жангы технологияны кеси аллына неда компьютер эмда магнит-резонанс томографияла, УЗИ, ангиография бла бирге хайырланыргъа жарайды. Аланы да къошса, анализ бютюнда тюз боллукъду, деп ышандыргъанды.

Университетни, «Севкаврентген-Д» предприятияны эмда Саулукъ сакълау министерствону келечилери Александр Турьянский бла ишчи байламлыкъла къураргъа сюйгенлерин билдиргендиле. Анга кёре семинарны ахырында тийишли къауум къураргъа да оноулашхандыла.

Омарланы Мурат хазырлагъанды.