Украинэм щекIуэкI дзэ Iуэху хэхам япэ махуэхэм щегъэжьауэ хэтщ ди республикэм щыщ щIалэхэр. Абыхэм ящыщ дэтхэнэри лIыгъэ щIапIэ йохуэ, псэзэ­пылъ­хьэпIэхэм Iуоуэ, гухэщIи   ялъагъу. Къулыкъу гугъум упэрытын икIи упэлъэщын пап­щIэ Iэчлъэчагъэ, лъэщагъ е Iущагъ къудейри мащIэу къы­щIэкIынущ. ЗауэлIым иIэн  хуейщ япэкIэ зыгъаплъэ, къару къыхэзылъхьэ гупсысэхэр. Ди щIалэ­хэм апхуэдэ гупсысэ-щIэ­гъэ­къуэн яхуохъу Хэкум, уна­гъуэм, фIыуэ ялъагъу цIыхухэм ятеухуахэр. Дзэ Iуэху хэхар къызэрыхъуу, ар щекIуэкI щIы­пIэм нэсахэм ящыщщ ди адыгэ щIалэ, Урысейм зыхъумэжыныгъэмкIэ и министерствэм хэт Сомгъур Алим. Ар гвардием и сержантщ.
 
- Армэм сыкъикIыжщ, илъэс зыбжанэ дэкIри, къулыкъу сщIэну контрактым Iэ тездзащ. Илъэс 12 хъуауэ сыхэтщ абы, - жеIэ Алим, и IуэхущIапIэм тепсэлъыхьу. - Сэ контракткIэ къулыкъум сыпэрытти, дзэ Iуэху хэха щекIуэкI щIыпIэм сыкIуэным е сымыкIуэным сегупсысын хуей хъуакъым. Си къалэнт, си лэжьыгъэт. Къэралым дзэм епха Iуэху къылъыкъуэкI хъу­жыкъуэмэ, Хэкум укъыщ­хьэ­щы­жыну ухуэхьэ­зырын хуейщ апхуэдэ IэнатIэм ущыпэрыткIэ, - жеIэ Алим дзэ Iуэху хэхар ще­кIуэкIым зэрыкIуам дыщыщIэупщIэкIэ. 
Сыт я щыIэкIэ къулыкъум пэрытхэм, я гупсысэм зригъэхъуэжрэ я нэгу щIэкIхэм, сыт щхьэмыгъазэ зыщIыр, сыт хуэдэ зыхэт гупыр, дауэрэ зызэщIагъакъуэрэ? Куэд мэхъу узэгупсысынкIэ хъунур. 
- Дзэ Iуэхум ущыхэткIэ, куэд уи нэгу щIокI, псэзэпылъхьэпIи уохуэ. Бэуэгъуэ дыщихуи къохъу зэм-зэмкIэрэ. Ди дивизионым хэтщ зы адыгэ щIалэ, дагъыстэн къытхэтщ, урысхэр ди гъусэщ. ЩIалэ хъар­зынэхэщ, дызэгуроIуэ икIи зызэщIыдогъакъуэ - нэгъуэщIу  хъунукъым, пхуехьэкIынукъым. Ди командирхэри цIыху хъар­зы­нэхэщ, хэкупсэхэщ, - жеIэ щIалэм. 
Сомгъурым къыгуроIуэ гъащIэм и лъапIагъэри цIыхухъу къалэным фIэкIыпIэ зэримыIэри. Къу­лыкъу къадэзыщIэхэм ящыщ хэкIуадэуи и нэгу щIэкIащ Алим. А псом упэлъэщын хуейщ, адэкIэ уи бгыр щIэкъузауэ къулыкъур еп­хьэкIын щхьэкIэ. 
- Дзэ Iуэхум ущыхэткIэ уи нэгум щIэкIхэм куэдым урагъэгупсыс. ГъащIэм и дэтхэнэ дакъикъэри зэ­ры­лъапIэр зыхыбощIэ. Ап­щIо­ндэхункIэ гугъуехьми уепсыхь – куэ­дым утогушхуэ, укъикIуэт зэ­ры­мыхъунур хьэкъ мэхъу, - жеIэ абы. 
Къулыкъум пэрытхэр щогуфIыкI я лъа­хэ­гъухэм къабгъэдэкIыу еры­с­къы, щыгъын хуабэ е сабийхэм дзэм хэтхэм хуатха письмо къа­щыIэрыхьэкIэ. Алим зэрыжиIэмкIэ, щIалэхэм щыгъыным я пкъыр игъэ­хуабэмэ, сабийхэм я IэкIэ ятха псалъэхэм гур егъэхуабэ. 
- Къулыкъум дыщыпэрыткIэ, ды­зы­хуеи­ну фэилъхьэгъуэхэр къы­дат. Щыгъыни, ерыскъыи, школа­кIуэ­хэм тхуатха письмохэри къытIэрохьэ. Ар, дауи, гуапэщ. Псом хуэ­мыдэу къыдохуэбылIэ Хэкум нытхурагъэш хьэпшыпхэр, - жеIэ. 
Алим и щхьэгъусэ Лаурэ къулыкъум пэрытыным и пIалъэр ещIэ. Ар УФ-м и Лъэпкъ гвардием ­КъБР-м щиIэ и къудамэм хэтщ. Лау­рэ къытхутепсэлъыхьащ щIалэм дзэ Iуэху хэхам къулыкъу зэрыщищIэм, абы зэрыдэкIам, и Iуэху зытетым. 
- Дзэ Iуэху хэхар къыщыхъеям япэ дыдэу дэкIахэм яхэтащ. Гъуэгу теувэну къыхатхыкIахэм зэращыщыр къыщытщIар дэ­кIы­ным сы­хьэтищ иIэжущ. Дыгузэващ, дауи. Гъуэгур пIащIэгъуэти, абы дытеп­сэлъыхьын къудейуи ды­хунэсакъым. Япэ­рауэ, здашэ щIы­пIэр ипэжыпIэкIэ зыми ищIакъым. Нэса нэужь, зэ хъыбар къыдитыфащ къыщыувыIа щIыпIэм теу­хуауэ. Япэхэм дзэ Iуэхум дашахэм зыкъыппащIэфыртэкъым. И Iуэху зытетыр умы­щIэмэ, гупсысэ куэд щызэблокI уи щхьэм. 
Аргуэру зэ зыкъытпищIэри, «Дыпсэущ, дыузыншэщ», - жиIэри хъыбар къыдигъэщIащ. Мызэ-мытIэу пIалъэкIэ зэпыуащ телефонкIэ дызэрыщIэныр. Сыгузавэри, къулыкъум къыдыхэт дагъыстэн щIалэм и телефоныр къэзгъуэтащ – абы хуэстхым, и хъыбар къызжиIэурэ екIуэкIащ зы пIалъэ. ИужькIэ, телефонымкIэ зызэпытщIэф хъужащ. 
Нэгъабэ гъэмахуэм Алим зыхэт гупым къахэуащ зыпэщIэтхэр. «Утэ­мэм, уузыншэ?» жысIэу щы­хуэстхым, жэуап къысIэригъэхьэ­фа­къым. Зэхэуэ зэрыхэхуар сщIэрт, и хъыбарыр зэпыуати, си гур куэ­дым жащ. Я гъусэ щIалэм и телефонымкIэ сбербанк онлайнкIэ зэгуэр ахъшэ езгъэхьауэ щытати, ар къыщIызогъэщыж… «Ягъэ щыIэкъым, абыхэм я деж сокIуэ, зыныппезгъэщIэнщ», - жеIэри, гузэвэгъуэр сщхьэщокI. 
Сомгъурым зыгъэпсэхугъуэ пIалъэу тхьэ­махуитIщ иIэр, унэм къыщыкIуэжым деж. 
- КъыщыкIуэжым деж хъыбар къыде­гъащIэ. Ауэ иужьу къыщы­кIуэжам иджыри и къежьэжы­гъуэр къэмыса ди гугъэу, къэ­сыжри дигъэгуфIащ, - жеIэ Лаурэ. 
Сабийхэм къахуэгъэсыркъым адэм и ­къекIуэлIэжыгъуэр. 
- Хъыджэбз цIыкIур нэхъыжьщ, къыгуроIуэ и адэр здэщыIэр, абы лIы­гъэ къызэрыщигъэлъагъуэр, гугъу зэрехьыр, Хэкум, унагъуэм къы­зэрытщхьэщыжыр. ЩIалэр цIыкIущи, лэжьапIэ жыжьэ гуэ­рым щыIэущ зэрищIэр. И къэ­кIуэ­жыгъуэр къахуэмыгъэсу йо­жьэ­хэр сабийхэр, школымрэ сабий са­дымрэ абы зэришэнур, къы­щы­щIэ­кIыжкIэ ар зэраIущIэнур, ды­зэрызэбгъэдэсынур я гурыфIы­гъуэщ. И къэкIуэжыгъуэ къэси къэкIуэжыпарэ зы­щIыпIи имыгъэзэжыну йохъуапсэхэр. Къатохьэлъэ щедгъэжьэжкIэ. 
Сомгъур Алим зыпэрыт къулыкъум къыщигъэлъагъуэ лIыгъэм, и бэшэчагъым папщIэ къэрал дамыгъэхэр къыхуагъэфэщащ. «Учас­тнику СВО», «За боевое отличие», Суворовым и цIэкIэ медалхэр иIэщ. Дамыгъэхэр и нэщэ­нэщ Хэку лъагъуныгъэм, дзэм хэтым а IэнатIэм хилъхьэ пэ­жы­гъэм. 
Сомгъур Алими абы хуэдэу къу­лыкъу езыхьэкI щIалэхэми узын­шэу я жьэгу ­ягъуэтыжыну Тхьэм жиIэ! 
ГУГЪУЭТ  Заремэ.