АвтомобилыщIэхэмкIэ Iэтащхьэр йохъуэхъу

1 октября, 2024 - 06:42

КъБР-м и МВД-м и IэнатIэхэм автомашинэщIэ 51-рэ дыгъуасэ иратащ. Iуэхур щекIуэкIащ Налшык къалэм Абхъазым и утым деж. Абы хэтащ КъБР-м и Iэтащхьэ КIуэкIуэ Казбек, КъБР-м къэрал кIуэцI IуэхухэмкIэ и министр полицэм и генерал-майор Крючков Вячеслав, КъБР-м и ­МВД-м и Жылагъуэ советым и унафэщI Мэкъушэ Руслан, къэрал кIуэцI IуэхухэмкIэ IэнатIэхэм я лэжьакIуэхэр. 
- Хабзэм кIэлъыплъынымкIэ, жылагъуэ шынагъуэншагъэр къызэгъэпэщынымкIэ нобэ жэуаплыныгъэшхуэ фэ фохь. Си фIэщ мэхъу, республикэм и МВД-м и лэжьакIуэхэм дэтхэнэми а жэуаплыныгъэр зэрызы­хэф­щIэр, фи къалэнхэр пщIэ пылъу адэкIи зэ­рыв­гъэзэщIэнур, - яжриIащ къызэхуэсахэм КIуэкIуэ Казбек. - Жылагъуэ шынагъуэншагъэм кIэлъыплъыным ди зэманым мыхьэ­нэшхуэ иIэщ. Лъэпкъ пэхуэщIэхэмкIэ Урысейм и Президентым и унафэхэр гъэзэщIэ­ным хыхьэу, иджыпсту гулъытэ ин хуащI техникэхэр зэхъуэкIыным. Нобэ ар ди деж щы­нэрылъагъущ. Къэбэрдей-Балъкъэрым ­нэхъ ипэкIи автомобилыщIэхэр къыхуащэ­хуауэ щытащ, адэкIи а Iуэхум пащэнущ. Шэч къытесхьэркъым техникэхэмрэ ахэр къы­зэрызэгъэпэща Iэмалхэмрэ фи лэжьыгъэр нэхъ къызэрывдагъэпсынщIэнум, сэбэп къызэрыфхуэхъунум. Ауэ къыхэзгъэщыну сыхуейт мыри: шынагъуэншагъэр зыми къызэригъэпэщыфынукъым, фэ фи жэ­уаплыныгъэмрэ лIыгъэмрэ щIымыгъумэ. Ды­зыщыгугъыр фэращи, ехъулIэныгъэфI­хэр фиIэну дынывохъуэхъу. 
КъБР-м къэрал кIуэцI IуэхухэмкIэ и министр полицэм и генерал-майор Крючков Вячеслав псалъэ щратым, къыхигъэщащ Урысей Федерацэм къыбгъэдэкI дэIэпыкъуныгъэм и фIыгъэкIэ, илъэс къэс республикэм гъуэгу шынагъуэншагъэм зэрыщыкI­э­лъыплъ техникэр зэрыщрагъэфIакIуэр, лэ­жьа­кIуэхэм я къалэнхэр нэсу ягъэзэщIэнымкIэ щIэгъэкъуэныфI зэрахуэхъур.
- Нобэ патруль автомобилу 50-м щIигъу къытIэрыхьащ. Ахэр, шэч хэмылъу, республикэм и полицэм щIэгъэкъуэныфI хуэхъу­нущ. Иджы япэу ди щIыналъэм и ­гъуэгухэм тетынущ «Кибер-Шериф» программэмкIэ къызэгъэпэща автомобилхэр. А программэм къалэн куэд егъэзащIэ, къэрал IэнатIэхэм я базэхэм асыхьэту запищIэфу. Къы­хэгъэщыпхъэщ, республикэм къэрал кIуэцI IуэхухэмкIэ и IэнатIэхэр транспорткIэ къы­зэрызэгъэпэщар мы зэманым проценти 100-м зэрынэблэгъар. 
Министрым лэжьакIуэхэр къыхуриджащ техникэр сакъыу зэрахьэну, гъуэгу хабзэхэр зэрагъэзащIэм тэмэму кIэлъыплъыну, егугъуу я къалэнхэр ягъэзэщIэну.
БАГЪЭТЫР Луизэ.
Сурэтхэр Къарей Элинэ трихащ.

  • 28 просмотров

Поделиться:

ЧИТАТЬ ТАКЖЕ:

24.05.2025 - 10:01

Къалэнышхуэхэр къапэщылъщ

КъБР-м и Парламентым щедэIуащ республикэм и бюджетыр 2024 гъэм зэрагъэзэщIам.
24.05.2025 - 09:03

Дызытес къудамэр пыдмыупщIу

ЦIыхухэр, псэущхьэхэр, къэкIыгъэхэр зи хэщIапIэ ЩIы Хъурейм гулъытэ хэха хуэщIыным теухуауэ ООН–м хигъэунэхукIа пIалъэхэм ящыщщ «Биологие зэмылIэужьыгъуагъэм и махуэ» жыхуаIэр.
24.05.2025 - 09:03

IэщIагъэм зыхагъэгъуазэ

«Пэрытхэм я зэщIэхъееныгъэ» зэгухьэныгъэм къызэ­ригъэпэща «МедиаПритяжение» урысейпсо проектым и щIыналъэ Iыхьэр Налшык къалэ щекIуэкIащ.
23.05.2025 - 09:14

ГущIэгъуншэт зауэр

ЩоджэнцIыкIу Алий и цIэр зезыхьэ Къэбэрдей къэ­рал драмэ театрым щагъэлъэгъуащ Васильев Борис и «А зори здесь тихие…» повестым къытращIыкIа «Пшэплъ даущыншэхэр» спек­таклыр.
23.05.2025 - 09:03

ЩIэныгъэмрэ щIалэгъуэмрэ

«Си хабзэубзыху жэрдэмыр» – аращ зэреджэр Бэрбэч ХьэтIутIэ и цIэр зезыхьэ Къэбэрдей-Балъкъэр къэрал университетым щыщ гупыр иджыблагъэ зыхэта урысейпсо зэхьэзэхуэм.