Бу кюнледе Кърымда «Заповедный Кавказ» илму жаш тёлю экспедиция бошалгъанды. Анга Кърымдан, Севастопольдан, Екатеринбургдан, Липецкден, Волгограддан, Нальчикден бла Москвадан экспертле къатышхандыла, аланы араларында Орус география обществону  «Альтаир» жаш тёлю клубуну башчысы Мокъаланы Тенгиз бла эксперти Игорь Белоусов да болгъандыла. 

Жыйылгъанла Кърымны энчи сакъланнган табийгъат жерлерине баргъандыла, маданият эсгертмелени кёргендиле, археология, тарых, геология жаны бла да кёп жангы зат билгендиле. Экспедицияны программасына кёре аланы Уллу  каньоннга, Уллу Севастополь жолгъа, Козырёк чучхургъа, Шан-Коба, Фатьма-Коба дорбунлагъа, Муловское кёлге, Балаклава шахарны ариу жерлерине элтгендиле. Кърымны Уллу каньону, «Байдарский» табийгъат заказник да жолоучулагъа сейир кёрюннгендиле. 
- Кавказда кёп жаш тёлю проектни башламчысыча, бу жолоучулукъну юсюнден оюмуму билдирирге сюеме. Биринчиден, ол эм бийик даражада къуралгъанын, анга география, экология, туризм жаны бла билимлери болгъан адамла къатышханларын белгилерге керекди. Экинчиден, къысха заманны ичинде кёп сейир затха тюшюннгенбиз. Жангы сезимле, жангы билим алгъанбыз, анга кёре уа жолоучулукъгъа салыннган борчла да толтурулгъанларына ишексизме, – дегенди МокъаланыТенгиз. 

Алай бла биринчи кюнде жолоучула Симферопольда жыйылгъандыла, бир бирлери бла танышханларындан сора, жюклерин да алып, автобус бла экисагъатлыкъ жолгъа чыкъгъандыла. Белгиленнген жерге жетгенде, алагъа къоркъуусузлукъну жорукълары ангылатылгъандыла, экскурсиягъа элтгендиле. Уллу каньонну, тамаша табийгъатны жууукъда кёрген, керти да, эсде къалырча эди. Кече ала Севастополь шахарны къатында Передовое элни Уркуста-парк деген палатка лагеринде къалгъандыла. Экинчи кюнню эрттенинде уа аланы буруннгулу адамла тургъан Шан-Коба бла Фатьма-Коба дорбунлагъа бютюнда сейир жолоучулукъла сакълай эдиле, алагъа жол къалын агъачны ичи, Кубалар сууну жагъасы бла ётгенди. Лагерьге артха къайтханда, жауун жаууп, чучхурла бютюн жашнагъандыла. Кюн тюзелгенден сора ала Тёбен кёлде сап-бордлада жюзгендиле, спортну кеслерине жангы тюрлюсюнде  сынашхандыла. 

Тенгиз бла Игорь Белоусов Кърымны эм узун карст дорбуну – Краснаягъа (Кизил-Коба), Севастопольну Херсонес Таврический деген буруннгулу кесегине, шахарны азатлар ючюн къазауатла болгъан жерлеге да баргъандыла.        

Ючюнчю кюн а Балаклавагъа жолоучулукъ бла къууандыргъанды, аны бла шагъырейлениу Чембало къаладан башланнганды, ол шахарны эм айтхылыкъ буруннгу жерлеринден бириди. Аны башындан Балаклава  бухта да кёрюнеди. Андан жыйылгъанла кёлге тюшюп солугъандыла, артха уа жартысы катерледе баргъандыла, къалгъан жартысы уа суу тюбюнде жюзген кемелени музейине къараргъа сюйгендиле. Зауукълу кюн ушакъла этиу бла бошалгъанды.  
Жолоучулукъну чегинде иш бла байламлы тюбешиуле да болгъандыла. «Кърым», «Альтаир» эм «Севастополь» жаш тёлю клубланы башчылары бла Орус география обществону жер-жерли бёлюмюню таматасы Сергей Бейцер жыйылыу бардыргъанды. Ала биригип проектле къурауну, башламчылыкъланы ётдюрюуню юсюнден сёлешгендиле.   

Проектни «Кърым» жаш тёлю клуб Росмолодёжьну ахча болушлугъу эм Орус география обществону информация себеплиги бла толтургъанды.

Кульчаланы Зульфия.